अब पाँचखालमा कृषि उपज संकलन तथा बजार केन्द्र

News Summary

Generated by OK AI. Editorially reviewed.

काभ्रेपलाञ्चोकको पाँचखालमा विषादी रहित जैविक तरकारी संकलन केन्द्र स्थापना भएको हो।
केन्द्रमा उत्पादन भएको कृषि उपजलाई प्याकेजिङ र ब्राण्डिङ गरी काठमाण्डौमा बिक्री गर्ने योजना छ।
प्रमुख महेश खरेलले दस वर्षअघि भएको दागलाई मेटाउन सफल भएको बताए।

७, असार, काभ्रेपलाञ्चोक । काभ्रेको पाँचखालमा कृषि उपज संकलन तथा बजार केन्द्र स्थापना भएको छ ।

विषादीको प्रयोग नगरी जैविक विषादीको मात्र प्रयोग गरेका तरकारी संकलन गर्न उक्त केन्द्र स्थापना भएको हो ।

एकीकृत शत्रुजिव व्यवस्थापन (आईपीएम) प्रविधिबाट उत्पादन भएको कृषि उपज संकलन तथा बजार केन्द्र सञ्चालनमा ल्याइएको पाँचखाल नगरपालिका प्रमुख महेश खरेलले जानकारी दिए ।

कृषि उपज संकलन तथा बजार केन्द्रको लागि पनि लवग्रिन नेपालको २५ लाख र पाँचखाल नगरपालिकाको ९ लाख रुपैयाँ साझेदारीका निर्माण भएको हो ।

केन्द्रबाट संकलन भएका कृषि उपजहरुको प्याकेजिङ, ब्राण्डिङ र सर्टिङ गरेर काठमाण्डौ सप्लाई गर्ने उद्देश्य रहेको बताइएको छ ।

यस केन्द्रले नगरमा विषादी रहित तरकारी उत्पादनमा सहयोग पुग्ने जाइका नेपालका प्रमुख प्रतिनिधि माचुजाकी मिजुकीले बताए ।

पाँचखाल नगरका प्रमुख महेश खरेलले एक दशक अगाडि पाँचखालमा उत्पादन भएको ताजा तरकारीको बारेमा दुस्प्रचार गर्दै दाग लगाउने कार्य भएकोमा उक्त दागलाई मेटाउन सफल भएको बताए ।

कृषकले उत्पादन गरेको ताजा तरकारीहरु सुरक्षित राख्न कोल्ड स्टोरको अवश्यक रहेको र सो कार्यको लागि जाइकासँग उनले अनुरोध गरे ।