स्कुलमै काम गर्दा आँखा गुमाएपछि खोसियो नरेन्द्रको जागिर

११ असार, काठमाडौं । कटारी नगरपालिका-२ उदयपुरका नरेन्द्र धमलाले आफ्नै गाउँमा रहेको श्री मावि कल्याणपुरमा १९ वर्ष कार्यालय सहयोगी भएर काम गरे ।

विद्यालयकै काममा खटिएका बेला नरेन्द्रले २०७८ सालमा आँखाको ज्योति गुमाउन पुगे । ८-९ पटकसम्म अप्रेसन गर्दा पनि उनको आँखा फर्किएन । त्यतिबेला उनले आँखा मात्र गुमाएनन्, जागिरसमेत गुमाए ।

‘विद्यालय निर्माणको क्रम चलिरहेको थियो । छतमा पानी लगाउने काम गरिरहेको अवस्थामा अकस्मात मेरो जीवनमा घटना घट्न पुग्यो । आँखामा नराम्रो चोट लाग्यो,’ उनले सामाजिक सञ्जाल फेसबुकमा लेखेका छन् ।

गहिरो चोट लागेपछि आफन्तले उनलाई लहान आँखा अस्पताल पुर्‍याए । कमजोर आर्थिक अवस्था भएका नरेन्द्रको उपचारका लागि आर्थिक संकलन गरियो । श्रमती मुनाका अनुसार काठमाडौं तिलगंगा आँखा अस्पतालमा समेत उनको उपचार भयो तर आँखाको ज्योति फर्किएन ।

‘८-९ पटक आँखाको अप्रेसन भयो । ज्योति फर्किएन । धेरै खर्च पनि भयो,’ मुनाले दुखेसो पोखिन् ।

श्रीमान्‌ले आँखाको ज्योति गुमाएपछि मुनाले नै विद्यालयमा कार्यालय सहयोगीको काम सुरु गरिन् । तर गत २८ वैशाखमा विद्यालय व्यवस्थापन समिति र केही शिक्षकले राजीनामा दिन लगाएको नरेन्द्रले गुनासो गरेका छन् ।

‘राजीनामा दिएपछि प्रक्रिया मिलाएर श्रीमतीको नाममा हुन्छ भन्ने प्रलोभन देखाएर राजीनामाको डेमो थमाए । मैले कसैको सहयोगमा लेखाएर राजीनामा दिएँ,’ नरेन्द्रले फेसबुकमा लेखेका छन् ।

तर, राजीनमा दिएको भोलिपल्ट विद्यालयले तालाचाबी मागेको उनले बताएका छन् । तर मुनाले चाबी दिइनन् । विद्यालयमा ई-हाजिरीको व्यवस्था गरेपछि आफूलाई अफ्ठ्यारोमा पारेको मुनाले बताइन् ।

‘श्रीमान्‌ले आँखा गुमाएपछि मैले काम गर्न थालेको ४ वर्ष भयो । मलाई नै काम दिने भनेपछि श्रीमान्‌ले राजीनामा दिनुभएको हो,’ उनले भनिन् ।

विद्यालय व्यवस्थापन समिति र प्रशासनले जबर्जस्ती राजीनामा दिन बाध्य बनाएको नरेन्द्र दम्पतीको गुनासो छ । तर व्यवस्थापन समितिका अध्यक्ष भानु गिरी भने राजीनामा जबर्जस्ती दिन नलगाएको बताउँछन् ।

‘नगरपालिकाको शैक्षिक सुधारअन्तर्गत विद्यालयमा ई-हाजिर राखियो । ई-हाजिरमा सम्बन्धित व्यक्ति चाहिने भयो । उहाँको घर टाढा भएकाले आफैं आउने स्थिति भएन । अनि राजीनामा दिनुभएको रहेछ । त्यसपछि नगरको शिक्षा शाखाले विज्ञापन आह्वान गरेको हो,’ अध्यक्ष गिरीले भने । गिरीले नरेन्द्र परिवारको पनि व्यवस्थापन गर्नुपर्ने बताए ।

विद्यालयको कार्यालय सहयोगीका लागि नगरले विज्ञापन गरेपछि ७ जनाको आवेदन परेको छ । जसमा मुनाले पनि आवेदन दिएकी छिन् । तर श्रीमान्‌को सट्टा आफूलाई नै राख्ने भनेर राजीनामा गराएकाले अरुलाई राख्न नहुने उनको जिकिर छ । विद्यालयमा आफूले गरेको कामको मूल्यांकन नभएको नरेन्द्रको तर्क छ ।