‘म साधु होइन’ भन्दै रक्सीको कुरामा किन रिसाइन् सुनिता आहुजा ?

बलिउड अभिनेता गोविन्दाकी पत्नी सुनिता आहुजा यतिबेला आफ्ना पतिभन्दा बढी चर्चामा छिन् । उनी बारम्बार कुनै न कुनै पोडकास्टमा देखा पर्छिन् र खुलस्त कुरा गर्छिन् ।

हालै उनको एउटा भिडियो तीव्र रूपमा भाइरल भइरहेको छ, जसमा उनी रक्सी पिउने विषयमा खुलस्त कुरा गर्दैछिन् । उनले आक्रमक रूपमा भनिन्, ‘म कसैको बाउको त पिउदिन ।’

केही समयअघि उनले एक मिडियालाई आफ्नो घर भ्रमण गराएकी थिइन् । सो क्रममा उनले होम बार पनि देखाएकी थिइन्, जहाँ अनेकथरी मदिरा सजाइएको थियो । उक्त मदिरालय आफ्नो ‘फेभरेट ठाउँ’ भनी उनले बताएकी थिइन् । त्यसमा अनेक टिप्पणी भएपछि सुनितालाई एक पोडकास्टमा मदिरालयबारे सोधिएको थियो ।

मदिरालयबारे के भनिन् सुनिताले ?

रक्सी पिउने प्रश्नमा सुनीताले भनिन्, ‘हो, म कसैको बाउको त पिउदिन । हेर्नुस्, जिन्दगीमा सन्तुलन राख्नुपर्छ । मैले कुनै साधुको रूप धारण गरेको छैन । मेरो पति छ, छोराछोरी छन्, पूजापाठ गर्छु, तर यसको मतलब म साधु हुँ भन्ने होइन । म दिनमा पूजापाठ गर्छु, तर यो होइन कि, म हरेक दिन बसेर रक्सी पिउछु । मान्छेलाई त सोख पनि हुन्छ, के आफ्नो सोख नै मारिदिनुपर्छ ? मान्छेहरूले ट्रोल गर्छन्, गरुन्, मलाई कुनै फरक पर्दैन ।’

जब उनलाई रक्सी पिउनु कस्तो राम्रो कुरा हो भनियो । तब उनले जवाफ दिइन्, ‘डाक्टरहरूले पनि भन्छन्, दुई पेग पिउनु मुटुका लागि राम्रो हुन्छ ।’ उनको यो भनाइ पनि अहिले भाइरल भएको छ ।