मृत्युपछि के हुन्छ तपाईंको गुगल अकाउन्टको भविष्य ?

आफ्नो मृत्युपछि तपाईंको गुगल अकाउन्टको भविष्य के होला ? के तपाईंले कहिल्यै कल्पना गर्नुभएको छ ?  मृत्युपछि के तपाईंको गुगल अकाउन्ट अरु कसैले खोल्न सक्छ ?

वास्तवमा हाम्रो डिजिटल जीवनमा जति कुराहरु हुन्छन् तीमध्ये कैयन् कुरा यस्ता पनि हुन्छन् जुन हामी जीवनभर गोप्य राख्न चाहन्छौं । यस्ता कुराहरू अरूको हातमा कहिल्यै पनि नपरुन् भन्ने हाम्रो चाहना हुन्छ । अझ इमेलजस्ता अनलाइन माध्यममा संग्रहित आफ्ना त्यस्ता निजी कुराहरुको गोपनीयता झनै संवेदनशील विषय बन्छ। जीवनका कैयन् पहलुहरु यस्ता पनि हुन्छन् जो मृत्युपछि पनि गोप्य रहँदा राम्रो हुन्छ ।

गुगलले प्रयोगकर्ताको यहीँ संवेदनशीलतालाई मध्यनजर गर्दै विशेष सुविधा उपलब्ध गराएको छ ।

गुगलले आफैं मेटाउँछ निस्क्रिय अकाउन्टहरू

हामी धेरैजसो समय अनलाइन रहन्छौं । तर, हामीमध्ये धेरैलाई थाहा नहुन सक्छ कि  यदि हाम्रो गुगल अकाउन्ट लामो समयसम्म प्रयोग भएन भने गुगलले त्यो अकाउन्टलाई डिलिट गरिदिन्छ ।

गुगलको नयाँ नीति अनुसार, यदि कुनै अकाउन्ट लगातार दुई वर्षसम्म निस्क्रिय भयो भने गुगलले उक्त अकाउन्टलाई स्थायी रूपमै हटाउन सक्छ। यसरी अकाउन्ट डिलिट भएसँगै त्यसमा रहेका सबै व्यक्तिगत जानकारीहरू, जस्तै नाम, ठेगाना, सुरक्षित राखिएका अन्य विवरण, इमेलहरू, फोटोहरू, कागजातहरुका साथै गुगल ड्राइभमा रहेका सामग्रीहरु समेत एकैपटक मेटिन्छन्।

त्यसैले, यदि आफ्नो गुगल अकाउन्ट डिलिट भएर महत्वपूर्ण डेटाहरु नहराउन् भन्नका तपाईंले समय-समयमा आफ्नो गुगल अकाउन्ट खोलेर सक्रिय बनाइराख्नु आवश्यक छ ।

प्रयोगकर्तालाई गुगलले धेरैपटक चेतावनी दिन्छ

गुगलले कुनै अकाउन्ट डिलिट गर्नु अघि प्रयोगकर्तालाई धेरै पटक सूचना (नोटिफिकेसन) पठाउँछ। प्रयोगकर्ता सक्रिय होओस् र उसको अकाउन्ट मेटिने अवस्था नआओस् भन्नका लागि गुगलले यसो गरेको हो। तर यदि चेतावनीहरू दिंदासमेत प्रयोगकर्ताबाट कुनै प्रतिक्रिया या गतिविधि नदेखिएमा गुगलले अन्ततः त्यो अकाउन्ट स्थायी रूपमै डिलिट गरिदिन्छ। एकचोटि गुगल अकाउन्ट डिलिट भइसकेपछि त्यसलाई पुनः प्राप्त गर्न सम्भव हुँदैन ।

अकाउन्ट कहिले निस्क्रिय पार्ने ? आफैंले तोक्न सक्नुहुन्छ

गुगलले तपाईंको अनुपस्थितिमा तपाईंको अकाउन्ट कसैले दुरुपयोग नगरोस् भनेर ‘इनएक्टिभ अकाउन्ट’ नामक फिचर सेट गर्न दिने सुविधा दिएको छ। यसमार्फत प्रयोगकर्ताले आफ्नो गुगल अकाउन्ट कुन समयबाट निस्क्रिय होस् भन्ने कुरा तय गर्न सक्दछन् ।

यदि तपाईंलाई आफ्नो निधनपछि आफ्नो गुगल अकाउन्टमा अरू कोही विश्वसनीय व्यक्तिले पहुँच पाओस् भन्ने चाहनुहुन्छ भने त्यस्ता केही छानिएका व्यक्तिहरूलाई पहिल्यै आफ्नो गुगल अकाउन्टमा पहुँच दिने व्यवस्था गर्न सक्नुहुन्छ।

गुगलले अकाउन्ट निस्क्रिय गर्ने समयसीमा तपाईं आफैंले ३ महिना, ६ महिना, १२ महिना वा १८ महिनासम्मको समय निर्धारण गर्न सक्नुहुन्छ।

जब तपाईंले तोकेको समयसीमा पुग्छ तब गुगल तपाईंको दर्तावाल इमेल वा फोन नम्बरमार्फत सम्पर्क गर्ने प्रयास गर्छ। यदि त्यसपछि पनि तपाईंबाट कुनै प्रतिक्रिया नआएमा गुगलले तपाईंको अकाउन्टलाई निस्क्रिय मानेर अगाडि बढ्नेछ। गुगलको यो फिचरले प्रयोगकर्ताको डिजिटल सम्पत्ति मेटेर वा अरुलाई जिम्मा दिएर सुरक्षित राख्न सहयोग पुर्‍याउँछ ।

अरूलाई दिन सकिन्छ गुगल अकाउन्टको पहुँच

भविष्यमा आफ्नो गुगल अकाउन्ट निस्क्रिय भएपछि अरू कोही विश्वासिलो व्यक्तिले त्यसमा पहुँच पाओस् भन्ने चाहनुहुन्छ भने गुगलले त्यस्तो सुविधा पनि उपलब्ध गराएको छ। त्यसका लागि तपाईंले अधिकतम १० जनासम्मको नाम छान्न सक्नुहुन्छ। ती व्यक्तिले तपाईंको अकाउन्ट निस्क्रिय भएपछि स्वतः सूचना (नोटिफिकेसन) पाउनेछन् ।

यसका लागि Add Person भन्ने अप्सनमा गएर तपाईंले कुन व्यक्तिले के–के सामग्री हेर्न सक्नेछन् भन्ने कुराको निर्णय गर्न सक्नुहुन्छ । जस्तै कसैलाइ इमेल हेर्न दिने, कसैलाई फोटो तथा अन्य डकुमेन्ट्स हेर्न दिने जस्ता अधिकारहरू अलग–अलग रूपमा तय गर्न सकिन्छ ।

यस प्रक्रिया पूरा गर्न तपाईंले ती व्यक्तिहरूको इमेल ठेगाना र केही अन्य आधारभूत जानकारी प्रविष्ट गर्नुपर्ने हुन्छ ।

आफैंले तय गर्न सकिन्छ गुगल अकाउन्टको भविष्य

गुगल अकाउन्ट निस्क्रिय भएपछि त्यसलाई डिलिट गर्ने कि नगर्ने भन्ने निर्णय पनि प्रयोगकर्ता आफैले लिन सक्दछन् ।

यसका लागि पहिले जुन समयसीमा (३, ६, १२ वा १८ महिना) छानिएको हुन्छ, त्यो पूरा भएपछि गुगलले प्रयोगकर्तालाई उसले तोकेका व्यक्तिहरूलाई नोटिफिकेसन पठाउँछ । त्यसपछि करिब तीन महिनाको समय दिइन्छ र त्यसक्रममा गुगल अकाउन्टधनीले अधिकार दिएको व्यक्तिले उक्त गुगल अकाउन्टमा रहेका डाटा डाउनलोड गर्न सक्छ ।

यदि तपाईंले अकाउन्ट डिलिट गर्ने विकल्प छान्नुभएको छ भने सो तीन महिनाको समय पूरा भएपछि गुगलले तपाईंको गुगल अकाउन्टलाई पूर्ण र स्थायी रूपमा डिलिट गरिदिन्छ।

यसरी हामीले सुरक्षित, जिम्मेवार र आफ्नो इच्छा अनुसार आफ्नो डिजिटल जीवनको अन्त्य योजनाबद्ध ढंगले गर्न सक्छौं । यसका लागि गुगलले हामीलाई निकै उपयोगी तरिका उपलब्ध गराएको हुन्छ ।