सर्वोच्चले माग्यो महिमानसिंह विष्टको रिट दर्ता नगर्ने आदेशको फाइल

News Summary

Generated by OK AI. Editorially reviewed.

सर्वोच्च अदालतले निलम्बित शाखा अधिकृत महिमान सिंह विष्टको रिट निवेदन दर्ता नगर्ने निर्णयको फाइल झिकाउने आदेश दिएको छ।
अदालतको आदेशले धरौटीमा छुटेको भए पनि निलम्बनको कारण दोहोरो कारबाहीमा परेको भन्दै विष्टले सर्वोच्चमा रिट निवेदन दिएका थिए।

२५ असार, काठमाडौं । सर्वोच्च अदालतले निलम्बित शाखा अधिकृत महिमान सिंह विष्टले पेश गरेको रिट निवेदन दर्ता नगर्ने निर्णयको फाइल झिकाउने आदेश गरेको छ ।

न्यायाधीश सुनिल कुमार पोखरेलको इजलासले विष्टको रिट निवेदन दरपीठ (अस्वीकार) गर्दाको फाइल (कैफियत प्रतिवेदन) झिकाउन आदेश दिएको हो ।

अदालतमा मुद्दा विचाराधीन भएको बेला सर्वोच्च अदालतको शाखा अधिकृत विष्टले पठाएको फर्जी कागजातका आधारमा नागरिक उन्मुक्ति पार्टी (नाउपा) का संरक्षक रेशम चौधरी पक्राउ परेका थिए ।

फर्जी कागजात तयार पारेको आरोपमा उनी विरुद्ध जिल्ला अदालत काठमाडौंमा मुद्दा चलिरहेको छ । त्यसका साथै सर्वोच्च अदालत प्रशासनले उनलाई निलम्बित समेत गरेको थियो ।

आफू अदालतकै आदेशले धरौटीमा छुटेको तर अदालत प्रशासनले निलम्बन गरेर दोहोरो कारबाहीमा परेको भन्दै विष्टले त्यसविरुद्ध सर्वोच्च अदालतमा रिट निवेदन पेश गरेका थिए ।

सर्वोच्च अदालत प्रशासनले रिट निवेदन दर्ता गर्न नमिल्ने भन्दै दरपीठ (दर्ता गर्न अस्वीकार) गर्ने आदेश गरेको हो । त्यही आदेश विरुद्ध निलम्बित शाखा अधिकृत विष्टले दिएको निवेदनमा न्यायाधीश सुनिलकुमार पोखरेलको इजलासले कैफियत प्रतिवेदन मगाउने आदेश गरेको हो ।