मन्त्री दाहालको दाबी : केही निर्माण कम्पनी र ठेकेदारमाथि कारबाही गरिरहेका छौं

फाइल तस्वीर

News Summary

Generated by OK AI. Editorially reviewed.

भौतिक पूर्वाधार तथा यातायात मन्त्री देवेन्द्र दाहालले समयमै काम नसक्ने निर्माण कम्पनी र ठेकेदारमाथि कारबाही प्रक्रिया तीव्र पारेको दाबी गरेका छन्।
उनले प्रतिनिधिसभाको बैठकमा केही ठेकेदारको ठेक्का रद्द गरी कालोसूचीमा राख्ने काम धमाधम भइरहेको जानकारी दिएका छन्।
मन्त्री दाहालले निर्माण व्यवसायी महासंघबाट प्राप्त तथ्याङ्क अनुसार विभिन्न वर्गका हजारौं निर्माण कम्पनीहरू मन्त्रालय र स्थानीय तहमा दर्ता भएको बताए।

३० असार, काठमाडौं । भौतिक पूर्वाधार तथा यातायात मन्त्री देवेन्द्र दाहालले सरकारले समयमै काम नसक्ने निर्माण कम्पनी तथा ठेकेदारहरूमाथि कारबाही प्रक्रिया तीव्र पारेको दाबी गरेका छन् ।

प्रतिनिधिसभाको सोमबारको बैठकमा मन्त्रालयगत प्रश्नोत्तर कार्यक्रममा बोल्दै मन्त्री दाहालले केही निर्माण कम्पनी र ठेकेदारमाथि कारबाही सुरु गरेको जानकारी दिएका हुन् ।

‘समयमै काम नसक्ने ठेकेदारहरुको ठेक्का रद्द गरी कालोसूचीमा राख्ने गरिएको छ,’ उनले भने ।

मन्त्री दाहालले समयमा काम नसक्ने ठेकेदारहरूको ठेक्का रद्द गर्दै कालोसूचीमा राख्ने काम अहिले धमाधम भइरहेको बताए ।

मन्त्री दाहालले निर्माण व्यवसायी महासंघबाट प्राप्त तथ्याङ्क प्रस्तुत गर्दै ‘क’ वर्गका ३४८, ‘ख’ वर्गका २७१ र‘ ग’ वर्गका १,०३१ वटा निर्माण कम्पनी भौतिक पूर्वाधार तथा यातायात मन्त्रालयमा दर्ता भएका बताए ।

उनले ‘घ’ वर्गका २२ हजार ५५१ ठेकेदार कम्पनीहरू स्थानीय तहमा दर्ता भएको पनि जानकारी दिए ।

उनले सडक आयोजना तथा भौतिक पूर्वाधार निर्माणको कामले समेत गति लिएको दाबी गरे ।

‘विकासे सबै मन्त्रालयसँग सम्बन्धित भएको कारण अहिले डाटा उपलब्ध गराउने अवस्था छैन,’ उनले भने, ‘अहिले काम नगर्ने ठेकेदार कम्पनीहरूलाई कालोसूचीमा राख्ने काम धमाधम भइरहेको छ ।’

मन्त्री दाहालले निर्माण सम्पन्न भइसकेका आयोजनाहरुको भुक्तानी फरफारक गर्नको लागि बजेटमा व्यवस्था गरिएको पनि बताए ।