एक सातादेखि त्रिविका ५ इन्जिनियरिङ क्याम्पसमा पठनपाठन ठप्प

३२ असार, काठमाडौं । त्रिवि, इन्जिनियरिङ अध्ययन संस्थान अन्तर्गतका क्याम्पसका शिक्षकहरूले स्वायत्तताको माग गर्दै पठनपाठन ठप्प पारेका छन् ।

१९ असारदेखि आन्दोलित भएका प्राध्यापकहरूले २५ गतेदेखि पठनपाठन नै रोकेका छन् ।

केन्द्रले इन्जिनियरिङ अध्ययन संस्थानको अधिकार खोसेको भन्दै शिक्षकहरूले ५ वटा क्याम्पसको पठनपाठन रोकेका हुन् ।

पुल्चोक क्याम्पस, थापाथली क्याम्पस, पूर्वाञ्चल क्याम्पस, पश्चिमाञ्चल क्याम्पस र चितवन क्याम्पसको पठनपाठन सञ्चालन भएको छैन ।

‘थापाथली क्याम्पसका सरहरू पनि पुल्चोकमा कोणसभामा आउनु भएको छ । डेढ दुई सय जना छौं । स्वायत्तताको अधिकार नपाएसम्म आन्दोलन जारी राख्छौं,’ प्राध्यापक सघं पुल्चोकका सहसचिव रोशन कार्कीले भने ।

इन्जिनियरिङ अध्ययन संस्थान डिन कार्यायलको आर्थिक स्वायत्तता र विकेन्द्रीकरणको अधिकार ऐन विपरीत केन्द्रले कटौती गरेको शिक्षकहरूको भनाइ छ ।

२०५५ सालमा बनेको विकेन्द्रीकरणको नियम अनुसार संस्थान सञ्चालदन हुँदै आएकोमा २०८० सालमा त्रिविको बजेट वक्तव्यले अधिकार कटौती गरेको हो । इन्जिनियरिङ क्याम्पसका शिक्षकहरूले २०८० देखि नै आन्दोलन गर्दै आएको बताउँछन् ।

‘२०८० सालदेखि नै चरणबद्ध आन्दोलन गर्दै आएका थियौं । सुनुवाइ नभएपछि अहिले पठनपाठन नै रोक्न बाध्य भएका हौं,’ कार्कीले भने ।

संस्थाको आर्थिक, शैक्षिक र प्रशासनिक स्वायत्ततामाथि गरिने कुनै पनि प्रकारको हस्तक्षेप तुरुन्त खारेज गर्नुपर्ने माग शिक्षकहरूको छ ।

‘कार्यकारी परिषद्ले विकेन्द्रीकरण स्थापित छ भनेर पत्र नलेखेसम्म आन्दोलन रोकिदैन,’ कार्कीले भने ।

शिक्षकहरूले सामूहिक राजीनामा समेत दिएका छन् । यसरी शिक्षकहरूले क्याम्पस ठप्प पारेपछि विद्यार्थीको पठनपाठन प्रभावित भएको छ ।

त्रिवि केन्द्रीय कार्यालयका एक उच्च अधिकारीका अनुसार आन्दोलरत पक्षसँग वार्ता र समस्या समाधान गर्न समिति गठन गर्ने तयारी छ ।

‘विद्यार्थीको पठनपाठन प्रभावित भइरहेको छ । समस्या समाधान गर्न एउटा कमिटी गठन हुन्छ,’ ती अधिकारीले भने ।