सेयर बजारबाट एक वर्षमा उठ्यो साढे १६ अर्ब पूँजीगत लाभकर

News Summary

Generated by OK AI. Editorially reviewed.

गत आर्थिक वर्ष २०८१/८२ मा सरकारले सेयर बजारबाट १६ अर्ब ५४ करोड ३७ लाख रुपैयाँ पूँजीगत लाभकर पाएको छ।
गत आर्थिक वर्षमा कुल ११६ कम्पनीले बोनस सेयर, प्राथमिक सेयर, एफपीओ, ऋणपत्र तथा म्यचुअल फण्डका इकाइ थपिएका छन्।
नेपाल स्टक एक्स्चेन्जका अनुसार गत आर्थिक वर्षको कारोबार रकम २१ खर्ब २४ अर्ब ९१ करोड रुपैयाँ पुगेको छ। जुन हालसम्मकै उच्च हो।

२ साउन, काठमाडौं । गत आर्थिक वर्ष २०८१/८२ मा सेयर बजारबाट सरकारले हालसम्मकै उच्च पूँजीगत लाभकर पाएको छ ।

सो आर्थिक वर्ष कुल १६ अर्ब ५४ करोड ३७ लाख रुपैयाँ पूँजीगत लाभकर उठेको सीडीएस एण्ड क्लियरिङ कम्पनीले जनाएको छ । यसअघि आर्थिक वर्ष २०७७/७८ मा सरकारले १४ अर्ब १३ करोड लाभकर पाएको रेकर्ड थियो ।

गत आर्थिक वर्षको पूँजीगत लाभकर अघिल्लो आर्थिक वर्ष २०८०/८१ को तुलनामा तीन गुणा बढी हो । अघिल्लो वर्ष सरकारले ५ अर्ब ५१ करोड रुपैयाँ पूँजीगत लाभकर पाएको थियो । गत आर्थिक वर्ष साउन महिनामा सबैभन्दा धेरै ४ अर्ब २३ करोड ७८ लाख रुपैयाँ पूँजीगत लाभकर उठेको छ ।

गत आर्थिक वर्ष २०८१/८२ मा कुल ११६ कम्पनीको बोनस सेयर, प्राथमिक सेयर, एफपीओ, ऋणपत्र तथा म्यचुअल फण्डका इकाइ थप भएका छन् । गत आर्थिक वर्ष नै सेयर कारोबारमा पनि रेकर्ड बनेको छ ।

नेपाल स्टक एक्स्चेन्जका अनुसार गत आर्थिक वर्ष कुल २१ खर्ब २४ अर्ब ९१ करोड रुपैयाँ बराबरको कारोबार भएको छ । कारोबार रकम अघिल्लो आर्थिक वर्ष २०८०र८१ को तुलनामा १८९ प्रतिशत बढी हो । यसअघि आर्थिक वर्ष २०७७/७८ मा सबैभन्दा धेरै १४ खर्ब ५४ अर्ब ४४ करोडको कारोबार रेकर्ड बनेको थियो ।