मनोहराको बाढीबाट सुकुम्बासी बस्ती जोगाउन जुट्यो वाईसीएल

६ साउन, काठमाडौं । मनोहराको बाढी सुकुम्बासी बस्तीमा पस्न नदिने उद्देश्यले नेकपा माओवादी केन्द्रको युवा संगठन योङ्ग कम्युनिस्ट लिग (वाईसीएल) नेपालले अस्थायी तटबन्ध सुरु गरेको छ ।

वाईसीएल बागमती प्रदेश र सम्पर्क विदेश प्रदेश कमिटीको आयोजनामा आज बिहानदेखि मनोहरा खोला पुलबाट करिब एक किलोमिटर उत्तरतर्फ बाँध बाँध्ने काम भइरहेको छ ।

‘स्थानीयले यसअघि ग्याबिन तारजाली लगाउनु भएको रहेछ, त्यसलाई बाढीले बगाएर खोलातिरै लगेको रहेछ । अनि अर्कोतिर अस्थायी तटबन्ध नभएको ठाउँबाट बाढी बस्तीमा पस्दो रहेछ । तिनै ठाउँमा आज अस्थायी तटबन्ध गर्न जुटेका छौं,’ वाईसीएल केन्द्रीय अध्यक्ष पुष्प ओलीले भने ।

उनका अनुसार बाँसका भाटाले बार लगाउने र त्योभन्दा पछाडि बालुवा–गिट्टी बोरामा भरेर बाँध बनाउने काम भइरहेको छ ।

यो काममा बागमती प्रदेशका माओवादी केन्द्रका नेताहरु, वाईसीएल फ्र्याक्सन इन्चार्ज रामप्रसाद सापकोटा (दीपशिखा) लगायत सहभागी छन् ।

वाईसीएलले यही साउन १ गतेदेखि ‘श्रम तथा उत्पादन अभियान’ सुरु गरेको थियो । अभियानको उदघाटन माओवादी केन्द्रका अध्यक्ष पुष्पकमल दाहाल प्रचण्डले गरेका थिए । सोही अभियान अन्तर्गत मनोहरा खोलामा बाँध बाध्न लागिएको वाईसीएलले जनाएको छ ।

‘आफैं स्रोतसाधन जुटाएर आज मनोहरामा बाँध बाँध्ने काम भइरहेको छ । यो अभियान श्रमबाट टुटेको कम्युनिष्ट कार्यकर्तालाई पुनः जोड्ने कडी पनि हो,’ वाईसीएल अध्यक्ष ओलीले भने, ‘श्रम तथा उत्पादनको हाम्रो अभियान दुई महिनासम्म जारी रहन्छ ।’