ललितपुरमा ५५ लाख मूल्यको बुद्धचित्त चोरी, ६ जना विरुद्ध मुद्दा

फाइल तस्वीर

News Summary

Generated by OK AI. Editorially reviewed.

ललितपुरको गोदावरी नगरपालिका–१० गोदामचौरमा ५५ लाख रुपैयाँ मूल्य बराबरको बुद्धचित्तको दाना चोरी भएको छ।
चोरीको आरोपमा एक नाबालकसहित ६ जनालाई मुद्दा चलाइएको छ।
उनीहरू विरुद्ध ५५ लाख रुपैयाँ बिगो मागदाबी गर्दै दफा २४१ अनुसार मुद्दा दर्ता गरिएको छ।

६ साउन, काठमाडौं । ललितपुरको गोदावरी नगरपालिका–१० गोदामचौरमा ५५ लाख रुपैयाँ मूल्य बराबरको बुद्धचित्तको दाना चोरी भएको छ ।

इबकुमारी शाही केसीले लगाएको एकै रुखमा फलेका ५५ लाख रुपैयाँ मूल्य बराबरका बुद्धचित्तको दाना चोरी भएको हो ।

चोरीको आरोपमा एक नाबालकसहित ६ जनालाई मुद्दा चलाइएको छ ।

जसमा गोदामचौरकै अंकित बिष्ट, रमेश बिष्ट, गोदावरी–३ का दिलीप पुरी, उनका भाइ सुनिल पुरी, गोदावरी–१० खसिमार टोलका सनम तामाङ र एक नाबालक छन् ।

यो समूहले १४ असार राति १ बजेतिर बुद्धचित्तको दाना चोरी गरेको प्रहरीको भनाइ छ ।

सुरक्षाका लागि जडान गरिएको सीसी क्यामेराको तार समेत काटेर बुद्धचित्तको रुखबाट दाना चोरी गरेको भन्दै प्रहरीमा जाहेरी परेको थियो ।

त्यसपछि उनीहरूलाई पक्राउ गरेर प्रहरीले अनुसन्धान अघि बढाएको हो ।

उनीहरू विरुद्ध ५५ लाख रुपैयाँ बिगो मागदाबी गर्दै मुद्दा दर्ता भएको छ । मुलुकी फौजदारी अपराध संहिताको दफा २४१ को चोरी गर्न नहुने कसुरमा मुद्दा चलाइएको छ ।