टोखाको २५ करोड प्रकरण : भरिया थुनामा, मालिकलाई सुटुक्क उन्मुक्ति

८ साउन, काठमाडौं । गत ४ चैतमा टोखाबाट २५ करोडभन्दा बढी रकमसहित पक्राउ परेका भरिया कारागार चलान हुँदा यसका मालिकले भने उन्मुक्ति पाएका छन् ।

ट्रकमा फल्स बटम बनाएर लुकाएर राखेको अवस्थामा यूरो र डलर गरी २५ करोडभन्दा बढी रकमसहित पक्राउ परेका भरिया (ट्रक चालक) फुच्चे भनिने कुसाङ लामा पुर्पक्षका लागि कारागार चलान भएका थिए ।

तर, अहिले यसका मालिक भने सुटुक्क रिहा भएको खुलेको छ । त्यतिबेला फरार रहेका २५ करोडका मालिक सिन्धुपाल्चोक भोटेकोशी गाउँपालिका-४ का ३५ वर्षीय नारायण पौडेल सुटुक्क अदालत उपस्थित भएर रिहा भएका हुन् ।

काठमाडौं जिल्ला अदालतका न्यायाधीश कृष्णप्रसाद शर्मा नेपालको ३२ असारको इजलासले पौडेललाई धरौटीमा रिहा गर्ने आदेश दिएको थियो । पौडेललाई ३५ लाख धरौटीमा रिहा गर्ने आदेश भएको काठमाडौं जिल्ला अदालतका सूचना अधिकारी दीपककुमार श्रेष्ठले बताए । अदालतको आदेशपछि तोकिएको ३५ लाख धरौटी बुझाएर मालिक पौडेल रिहा भएका हुन् ।

जबकि, यो केसमा यसअघि भरियालाई काठमाडौं जिल्ला अदालतले नै पुर्पक्षका लागि कारागार पठाएको थियो । ३ वैशाखमा न्यायाधीश ठाकुरप्रसाद खरेलको इजलासले भरिया सिन्धुपाल्चोकको भोटेकोशी गाउँपालिका-१ का लामालाई पुर्पक्षका लागि कारागार चलानको आदेश दिएको थियो ।

एकै मुद्दामा भरिया पक्राउ परेर पुर्पक्षका लागि कारागार चलान हुँदा मालिक भने सुटुक्क अदालत उपस्थित भएर धरौटी तिरेर छुटेका छन् ।

४ चैतमा काठमाडौं उपत्यका अपराध अनुसन्धान कार्यालयले टोखास्थित झोरबाट चीनको केरुङतर्फ जान लागेको ना७ख १६५२ नम्बरको ट्रकबाट उक्त रकमसहित चालक लामालाई पक्राउ गरेको थियो । लामा उक्त रकमको भरिया रहेको खुलेको थियो ।

त्यतिबेला मालिकको भने पहिचान हुन सकेको थिएन । बरामद ५००, २००, १०० दरका जम्मा १३ लाख ७५ हजार १५० यूरो र १०० र ५० दरका ३ लाख २० हजार ८५० डलर (तत्कालीन प्रचलित मूल्यअनुसार २५ करोड १९ लाख २४ हजार ९५० नेपाली रुपैयाँ), ट्रक र भरिया लामासहितलाई थप अनुसन्धान तथा कारबाहीका लागि राजस्व अनुसन्धान विभाग हरिहरभवन बुझाइएको थियो ।

भरिया मात्रै पक्राउ गरेर मालिकलाई चोख्याएको, मालिक खोई भन्दै यो विषयले संसद्‌सम्म चर्चा पाएको थियो । केही समयपछि विभागले यसका मालिक पनि पहिचान गरेको थियो ।

‘संसद्‍सम्म यसका मालिकबारे प्रश्न उठेको थियो । जसका कारण पनि मालिक पहिचान गर्न हामीलाई चुनौती थियो । तर सफल भयौं,’ विभागका महानिर्देशक चण्डीप्रसाद घिमिरेले भनेका थिए ।

विभागले २० चैतमा पत्रकार सम्मलेन गर्दै यो रकमका मालिक पौडेल रहेको बताएको थियो । तर त्यतिबेलासम्म पनि उनी फरार नै थिए । पक्राउ परेका भरिया लामा र फरार मालिक पौडेलविरुद्ध विदेशी विनिमय (नियमित गर्ने) ऐन २०१९ अन्तर्गतको कसुरमा २ वैशाखमा मुद्दा दायर गरिएको थियो ।

उनीहरूविरुद्ध बरामद भएको रकम बराबरको बिगो र जरिवाना मागदाबी गर्नुका साथै ट्रकलाई कसुरजन्य सम्पत्ति तथा साधन (रोक्का, नियन्त्रण र जफत) ऐनअनुसार जफतका लागि मागदाबी गरिएको थियो ।

यो पनि पढ्नुहोस

टोखामा बरामद २५ करोडको ‘नेक्सस’ सुन कारोबारीसँग

भरिया मात्र पक्राउ परेपछि मालिक कहाँ छन् भन्ने अनलाइनखबरको प्रश्नमा त्यतिबेला विभागका महानिर्देशक चण्डीप्रसाद घिमिरेले भारत पुगेको भन्ने सूचना प्राप्त भएकोसम्म बताएका थिए । तर उनलाई पक्राउ परेर नेपाल ल्याउन सम्बन्धित संयन्त्र असफल भएको थियो ।

फरार रहेको करिब ४ महिनापछि सुटुक्क अदालत उपस्थित भएका पौडेल सुटुक्कै रिहा भए । भरिया पक्राउ परेर कारागार चलान हुँदा यसका मालिक सुटुक्क रिहा हुनुले अनुसन्धानको सुरुवातकर्ता प्रहरीदेखि राजस्व अनुसन्धान विभागका कर्मचारीसम्म अचम्मित भएका छन् ।

‘स्रोत बिनाको यति ठूलो मात्रामा त्यो पनि विदेशी रकम बरामद भएको छ । अर्कोतर्फ भरियासमेत यसअघि नै पुर्पक्षका लागि कारागार चलान भएका छन् । यति हुँदाहुँदै पनि मालिक भने धरौटीमा सुटुक्क रिहा हुँदा हामी पनि छक्क परेका छौं,’ एक अनुसन्धान अधिकृतले अनलाइनखबरसँग भने ।

अनुसन्धानका क्रममा मालिक पौडेलको अन्तिम लोकेसनसमेत रकम बरामद भएनजिकै देखिएको थियो । जसका कारण यो रकम चीततर्फ लैजान उनको प्रत्यक्ष संलग्नता हुनसक्ने थप आधार तय भएको थियो ।

तर, यी प्रमाणहरूलाई अनदेखा गर्दै अदालतले मालिकलाई उन्मुक्ति दिएको छ । एक त ठूला घटनामा मालिकको पहिचान हुनै गाह्रो हुने र भइहालेर बल्लतल्ल मुद्दा चल्दा रिहाइ हुनुले आशंका गर्नेहरूलाई थप बल पुर्‍याएको देखिन्छ ।

यो पनि पढ्नुहोस

ट्रकमा २५ करोड राखेको भिडियो भेटियो, मालिकको अन्तिम लोकेसन टोखा

यो पनि पढ्नुहोस

ट्रकमा २५ करोड राखेको भिडियो भेटियो, मालिकको अन्तिम लोकेसन टोखा

टोखा नगरपालिका-१० महादेवटार हाइटस्थित आफ्नै घरमा बसोबास गर्ने पौडेलकै मुख्य लगानी र योजनामा यो रकम चीन जान लागेको विभागको अनुसन्धानबाट खुलेको थियो । प्रहरीको प्रारम्भिक अनुसन्धानले काठमाडौंबाट यूरो र अमेरिकी डलर चीन लगेर उताबाट सुन लिएर आउने गरको निष्कर्ष निकालेको थियो ।

पौडेलले प्रयोग गर्ने मोबाइल र भरिया लामाको मोबाइलमा समेत सूचना आदानप्रदान भएको र फोन सम्पर्क भएकोसमेत भेटिएको थियो । प्रहरीले ११ बजे राति चालक कुसाङलाई पक्राउ गर्नुभन्दा केही समय पहिला मात्रै पौडेल र लामाबीच फोनमा कुराकानी भएको विवरण समेत भेटिएको थियो ।

पौडेलकै संलग्नतामा उक्त रकम ट्रकमा राखिएको सीसी क्यामेराको फुटेज समेत भेटिएको थियो । पौडेलले करिब साँझ साढे ६ बजेतिर उक्त रकम ट्रकमा राखेको फुटेजमा देखिएको थियो ।

यतिसम्म कि, आर्थिक अवस्था एकदमै न्यून रहेका लामालाई यो ट्रक नै तस्करी गर्नका लागि पौडेलले किनिदिएको हुनसक्ने आशंका गरिएको थियो ।

लामा यसअघि पनि १३ पुस २०७३ मा ७ किलो सुनसहित पक्राउ परेका थिए । यो प्रकरणमा उनी ५ वर्ष जेल बसेर २०७८ मा छुटेका थिए ।

काठमाडौं जिल्ला अदालतमा न्यायाधीश तेजेन्द्र शर्मा सापकोटाको इजलासले २६ असार २०७४ मा ३ करोड १६ लाख २६ हजार रुपैयाँ जरिवाना र एक वर्ष कैदको फैसला सुनाएको थियो । तोकेको जरिबाना तिर्न नसेपछि उनले पाँच वर्ष जेल बस्नु परेको थियो ।

यिनै कमजोर आर्थिक अवस्था भएका लामालाई प्रयोग गरेर पौडेलले २५ करोडको भरिया बनाएको प्रमाण हुँदाहुँदै उनलाई भने अदालतले उन्मुक्ति दिएको छ ।