१ शो, ७ प्रस्तोता : ‘द फ्याब शो’ हिमालय टिभीमा आउँदै

News Summary

Generated by OK AI. Editorially reviewed.

टेलिभिजन कार्यक्रम 'द फ्याब शो' आगामी विहिबारदेखि हिमालय टिभीमा प्रसारण हुने भएको छ।
समीरमणी दीक्षितको नेतृत्वमा मिस नेपाल अर्थ २०२४ सुमना केसी, भ्लगर लेक्स लिम्बु लगायत ६ प्रस्तोताले कार्यक्रम संचालन गर्नेछन्।
शो हरेक विहीबारदेखि सोमबार बिहान ७ः३० देखि ८ः३० बजेसम्म र बेलुका ९ देखि १० बजेसम्म हिमालय टिभीमा प्रसारण हुनेछ।

काठमाडौं । टेलिभिजन कार्यक्रम ‘द फ्याब शो’ प्रसारणमा आउने भएको छ । आगामी विहिबारदेखि हिमालय टिभीमा शो आउनेछ ।

समीरमणी दीक्षितको नेतृत्वमा अन्य ६ प्रस्तोताले कार्यक्रम संचालन गर्नेछन् । मिस नेपाल अर्थ २०२४ सुमना केसी, भ्लगर र लैंगिक अल्पसंख्यक समुदायका अभियन्ता लेक्स लिम्बु, उद्यमी सिर्जना जोशी, ज्योतिष सुरेशचन्द्र रिजाल, खेल संवाददाता अनन्त वाग्ले र कवयत्री विपना अधिकारी प्रस्तोता छन् ।

सूचना, मनोरञ्जन र रमाइला पाहुना विशेष हुने यो शोलाई नयाँ शैलीबाट ल्याइने प्रस्तोता दीक्षितले बताए ।

‘शो नयाँ तरिकाबाट आउँदैछ । अन्त किन हेर्ने ? हामीसँग सबैथोक छ । हामीसँगै सूचना, इन्टरटेनमेन्ट र रमाइला गेस्ट हुनेछन्’ उनले भने ।

विचार क्रिएसनको प्रस्तुतिमा आउन लागेको यो शो दर्शकको लागि जानकारीमूलक र उत्प्रेरक हुने विश्वास समीरमणीको छ । यो शोका लागि विचार क्रिएसन र हिमालय टिभीबीच एक वर्षको सम्झौता छ ।

‘द फ्याब शो’ हरेक साताको विहीबारदेखि सोमबारसम्म बिहान ७ः३० बजेदेखि ८ः३० बजेसम्म हिमालय टिभीमा प्रसारण हुनेछ । सोही दिनमा बेलुका हिमालय टिभी प्रिमियममा ९ देखि १० बजेसम्म आउनेछ ।

साथै, हिमालय टिभीको फेसबुक र युट्युब च्यानलमा बेलुका ६ देखि ७ बजे शो स्ट्रिमिङ हुनेछ ।