‘महादशा’बाट फिल्ममा डेब्यू गर्दै र्‍यापर हाकिम गुरुङ, किरण नेपालीले निर्देशन गर्ने

News Summary

Generated by OK AI. Editorially reviewed.

निर्माता किरण नेपालीले 'महादशा' मार्फत फिल्म निर्देशनको थालनी गर्ने निर्णय गरेका छन्।
फिल्ममा र्‍यापर हाकिमले अभिनयमा डेब्यू गर्नेछन् र प्रमोद अग्रहरि, प्रेमा लामगाढे, हाकिम गुरुङ अभिनय गर्नेछन्।
फिल्म संस्कार, संस्कृति, आध्यात्म र ग्रह-नक्षत्रको प्रभावको कथावस्तु प्रस्तुत गर्नेछ र प्रदर्शन मिति छायांकनपछि घोषणा गरिनेछ।

काठमाडौं । निर्माता किरण नेपालीले ‘महादशा’मार्फत फिल्म निर्देशनको थालनी गर्ने भएका छन् । बुधबार आयोजित पत्रकार सम्मेलनमा उनले आफ्नो डेब्यू निर्देशकीय फिल्मको शीर्षक र प्रि–टिजर सार्वजनिक गरे ।

लेकाली इन्टरटेन्मेन्टको ब्यानरमा फिल्म निर्माण गर्न लागेको हो । प्रि-टिजरमा कलाकार प्रमोद अग्रहरि, प्रेमा लामगाढे र हाकिम गुरुङलाई परम्परागत भेषभूषामा प्रस्तुत गरिएको छ ।

फिल्ममा रियर राईको पनि अभिनय हुनेछ । चर्चित र्‍यापर हाकिमले यो फिल्मबाट फिल्म अभिनयमा डेब्यू गर्दैछन् । उनले यसअघि ‘सौर्य’ फिल्म निर्माण र म्युजिक कम्पोज गरेका थिए ।

‘अफर आयो र फिल्म खेल्ने निर्णय गरेँ’ हाकिमले अनलाइनखबरसँग भने ।

फिल्ममा राजे के. शाह, श्याम मगर र अमलादेवी राईले लगानी गरेका छन् । सुरज आचार्य कार्यकारी निर्माता हुन् । मनिष गौतमको पटकथा छ ।

फिल्मले संस्कार, संस्कृति, आध्यात्मसँगै समाजमा विद्यमान रहस्यमय घटनाक्रम तथा मानिसको जीवनमा पर्ने ग्रह-नक्षत्र र कर्मको प्रभावको कथावस्तु पेश गर्ने जनाइएको छ ।

प्रोडक्सन म्यानेजर अनिश अधिकारी र समर चौलागाई रहेको फिल्मको प्रदर्शन मिति भने छायांकन पुरा भएपछि मात्र घोषणा गरिने निर्माताले जनाइएको छ ।