फोहोर व्यवस्थापन गर्न नेपाल टेक मार्केटले बनायो एप्स

११ भदौ, काठमाडौं। नेपाल टेक मार्केटले नयाँ फोहोर व्यवस्थापन प्रणाली सम्बन्धी एप्स सार्वजनिक गरेको छ। कम्पनीले आज फोहोर व्यवस्थापनको क्षेत्रमा एक नयाँ आयाम थप्ने लक्ष्यका साथ उक्त एप्स सार्वजनिक गरेको हो ।

नेपाल टेक मार्केटका प्रमुख प्राविधिक अधिकृत मङ्गल प्रधान यो प्रणालीले स्मार्ट प्रविधिको प्रयोग गरी नेपालमा फोहोर व्यवस्थापनमा थप नयाँ लक्ष्य राखेको बताए ।

उनले भने, ‘ फोहोर व्यवस्थापनमा प्रविधिको प्रयोगमा हामीले नयाँ आयाम ल्याउन सुरू गरेका हौं।’ उनका अनुसार यो प्रणालीलाई प्रयोगकर्ता-मैत्री बनाउन नवीनतम प्रविधि र विश्वव्यापी ट्रेन्डहरू समावेश गरिएको छ। यो प्रणाली बलियो, सुरक्षित र प्रयोग गर्न सजिलो छ।

यस्तै फोहोर संकलन र व्यवस्थापनलाई अझ प्रभावकारी बनाउने कम्पनीका प्रमुख व्यवसायिक अधिकृत सुष्मिता पौडेलको भनाइ छ । उनले यो प्रणालीले प्रयोगकर्ताहरूबाट सकारात्मक प्रतिक्रिया पाएको र उनीहरू निरन्तर ग्राहकको अनुभव सुधार गर्न प्रतिबद्ध रहेको प्रतिक्रिया दिइन् ।

यो एप्सले फोहोर व्यवस्थापन सफ्टवेयरको सम्भावित प्रयोगकर्ताहरू खोज्नेछन्। जुन फोहोर व्यवस्थापनमा काम गर्ने हुने संस्थाहरू, फोहोर उत्पादन गर्ने घरायसी बासीहरू, व्यवसायहरू जस्तै हस्पिटल, होटल, स्कुल, सरकारी संस्थाहरू आदि हुन्।

यस सिस्टममार्फत प्रत्येक फोहोर व्यवस्थापन गर्ने कम्पनी, फोहोर उत्पादन गर्ने संघ संस्था, घरहरूबीच अन्तर्सम्पर्क गर्न सकिने पनि सुविधा उपलब्ध गराइएको छ। । फोहोर व्यवस्थापन गर्न लाग्ने शुल्कको अनलाइन भुक्तानी गर्नु साथ-साथै यो सिस्टमले नगरपालिकाको लागि पनि छुट्टै ड्यासबोर्ड उपलब्ध गराएको छ।

नगरपालिकाका यूजरबाट आफ्नो नगर/वडामा फोहोर व्यवस्थापनका के–के गतिविधिहरू भइरहेको छ भनेर थाहा पाउन सक्नेछ।