कांग्रेस-एमालेले दलीय भागबण्डा गरेर सत्ता कब्जा गरिरहेका छन् : डा. वाग्ले

१३ भदौ, अटवा । राष्ट्रिय स्वतन्त्र पार्टीका उपसभापति तथा सांसद डा. स्वर्णिम वाग्लेले नेपाली कांग्रेस, नेकपा एमाले लगायतका ठूला दलले नियामक निकाय, अख्तियार र न्यायालयमा समेत दलीय आधारमा भागबण्डा गरेर ‘स्टेट क्याप्चर’ गरेको आरोप लगाएका छन् ।

झन्डै एक साता लामो क्यानडा भ्रमणका क्रममा राजधानी अटवामा नेप्लिज क्यानडियन एसोसियसन अफ अटवाद्वारा आयोजित एक अन्तरक्रियालाई सम्बोधन गर्दै डा. वाग्लेले दलहरूको यस्तै गतिविधिले नेपाल अहिले उदार लोकतन्त्रबाट अनुदार लोकतन्त्र हुँदै लुटतन्त्र (क्लेप्टोक्रेसी) मा परिणत भएको आरोप लगाए ।

उनले रास्वपा सभापति रवि लामिछानेमाथि राज्यले प्रतिशोध लिइरहेको बताए । ‘नेपालमा सहकारीहरूबाट झन्डै ८ हजार ८०० करोड रुपैयाँ अपचलन भएकोमा गोर्खा मिडियामा ६५ करोड रुपैयाँ सहकारीको रकम गएको देखिन्छ’ उनले भने, ‘सांसद सूर्य थापा संयोजक रहेको संसदीय छानबिन समितिले प्रचलित कानुन अनुसार गर्नु भनेर सिफारिस गरेको छ।’

उनले थपे, ‘तर सरकारले पाँच जिल्लाका तीन तहका अदालतहरूमा रवि विरुद्ध मुद्दा दायर गरी प्रतिशोध लिइरहेको छ ।’

उनले रविलाई अन्यायपूर्वक थुनामा राखिएको भनी झन्डै ३५ लाख नेपालीले हस्ताक्षर गरिसकेको र दशैं-तिहार-छठसम्म ५० लाख नाघ्ने आफूहरुले अपेक्षा गरेको उनले बताए । जनता जाग्ने हो भने अहिलेको गडबडी धेरै समय नटिक्ने बताए ।

‘प्रदेश संरचना होइन, प्रदेश सभा हटाऔं’

सांसद वाग्लेले आफ्नो पार्टी प्रदेशगत संरचना नभई प्रदेश सभा हटाउनु पर्ने पक्षमा रहेको जानकारी दिए।

‘देशभरि ८८४ जना सांसदहरू रहेकोमा प्रदेशहरूमा ५५० जना सांसदहरू छन्। यत्रो संरचना राज्यले धान्न सक्दैन’ उनले भने, ‘छरितो प्रदेश सरकार बनाएर विधायकी जिम्मा गाउँपालिका तथा नगरपालिकाका जननिर्वाचित प्रतिनिधिहरूलाई दिन सकिन्छ ।’

नेपालमा भ्रष्टाचार बढ्नुमा खर्चिलो चुनाव प्रणाली पनि एउटा कारण रहेको बताउँदै डा. वाग्लेले चुनावमा टिकट पाउन पनि आफ्नै पार्टीका नेतालाई पैसा ख्वाउनुपर्ने स्थिति आएको बताए।

यही स्थितिको अन्त्य गर्न रास्वपालेरूपन्देहीको उपचुनावका लागि उम्मेद्वार छनोट गर्न ‘प्राइमरी प्रणाली’ को अभ्यास गरिरहेको सांसद वाग्लेले बताए।

उनले नेपालको राजनीतिलाई सफा गर्न सही नीति, सफा नियत र क्षमता भएको वर्ग अघि सर्नुपर्ने बताए ।

‘डायस्पोरा नेपाल रुपान्तरणमा सहभागी होस्’

एक प्रश्नको जवाफमा संयुक्त राष्ट्रसंघ लगायतका निकायमा काम गरिसकेका अर्थशास्त्री वाग्लेले गएको २५-३० वर्षमा नेपालमा विकासका सूचकहरूमा प्रगति भएता पनि अरू मुलुकहरूको दाँजोमा नेपाल पछि पर्दै गएको बताए।

‘सन् १९८० को दशकसम्म भारत, चीन र हाम्रो प्रतिव्यक्ति आय २०० डलरको हाराहारीमा थियो। तर अहिले भारतको प्रतिव्यक्ति आय २७०० डलर नाघेको छ भने चीनको १३ हजार डलर नाघेको छ, तर हाम्रो भने १५०० डलर छ’ उनले भने ।

उनले अगाडि थपे, ‘हामीले सही आर्थिक नीति लियौं र राजनीतिक स्थायित्व भयो भने आगामी १० वर्षमा हामी पुग्ने भनेको प्रतिव्यक्ति आय चार हजार डलर भएको अहिलेको श्रीलंकाको स्तरमा हो। त्यसैले हाम्रो क्षमता र सम्भावनाका बारेमा हामीले आम जनसमुदायसँग इमान्दारीपूर्वक कुराकानी गर्नु पर्छ ।’

सम्बोधनको क्रममा डा. वाग्लेले नेपालको रूपान्तरणमा सहभागी हुन् डायस्पोरालाई आह्वान गरे। उनले नेपालजस्तो मुलुकका लागि डायस्पोरा एक प्रमुख स्रोतको रूपमा रहेको पनि बताए।

‘हाम्रो समाजमा शिफ्ट आएको छ, तर चरम निराशा छ। मध्यम वर्गमा आफ्ना आकांक्षा पूरा गर्न विदेश नै जानुपर्छ भन्ने धारणा बन्दै गएको छ’ उनले भने, ‘तर, यसलाई पलायनको रूपमा नहेरी संसारभरि रहेका नेपालीसँग रहेको सीप, स्रोत र अनुभवलाई नेपालको विकासमा उपयोग गर्नुपर्छ ।’

एनआरएनहरूलाई देशका केही सम्मानित र संवेदनशील बाहेक अरू पदमा बसेर काम गर्न पाउने वातावरण बनाउनुपर्नेमा उनले जोड दिए ।

वाग्लेले आउँदो चुनावपछि रास्वपालाई देशकै सबैभन्दा ठूलो र निर्णायक पार्टी बनाउन प्रयास गरिरहेको बताए ।