लाठी र फरुवाले हानेर तड्पाउँदै मारियो कुकुर, दोषीलाई कारबाहीको माग

काठमाडौं । दुई पुरुषले कुकुरलाई मासु देखाएर नजिक बोलाउँछन् । कुकुर नजिक आएपछि टाउकोमा लाठी र फरुवाले हानेर तड्पाउँदै मार्छन् । हेर्नै नसकिने यो भिडियो अहिले सामाजिक सञ्जालमा भाइरल छ ।

एउटा निरीह प्राणीलाई झुक्याएर हत्या गर्नेमाथि कारबाही गर्नुपर्ने भन्दै धेरैले प्रहरीको ध्यानाकर्षण गराएका छन् ।

घटना चितवन पदमपुरस्थित कालिका क्षेत्रमा भएको हो । दुई पुरुषले कुकुरलाई मासु देखाएर निर्ममतापूर्वक हत्या गरेका छन् । यस घटनाप्रति पशु अधिकारकर्मी र सर्वसाधारणले चासो देखाएर अपराधीलाई कारबाही गर्नुपर्ने माग गरेका छन् । घटनाको प्रत्यक्षदर्शीका अनुसार, कुकुरले टोक्न आयो भनेर उसलाई मासु देखाइ फकाएर लाठी र फरुवाले हिर्काएर मारिएको हो ।

पशु अधिकारकर्मी इरफान खानले यो घटनालाई क्रूर र गैरकानुनी दोषीमाथि कारबाहीको माग गरेका छन् । कुकुरलाई मारेर कुकुरकै दोष देखाउने प्रवृत्ति रहेको खान बताउँछन् । कुकुर मारेका अधिकांश घटनामा ‘कुकुरले टोकेको वा टोक्न आएको भनी दोष लगाउने गरेको उनको भनाइ छ।

‘कुनै कारण बिना कुकुरले टोक्दैन’ इरफान भन्छन्, ‘चलाएको, तड्पाएको वा जिस्क्याएको हुनुपर्छ । या त कुकुरलाई कुनै समस्या भएको हुनसक्छ । तर, मासु दिँदा खान आउने कुकुरले कसरी टोक्न झम्टन्छ?’

कुकुरले टोक्न आयो भन्दैमा मार्न पनि नपाइने उनले बताए ।

घटनाको एक प्रत्यक्षदर्शीले सो दृश्य हेर्नै नसकिने भएको बताइन् ।

‘अफिसको कामले भिजिटमा थिएँ, बाटोमा यो घटना देखेपछि २३–२४ सेकेन्डको भिडियो रेकर्ड गरेँ’ उनले सुनाइन्, ‘भिडियो बनाएको थाहा पाएपछि ती मान्छेहरूले मलाई पछ्याए । म त्यहाँबाट अटो चढेर भाँगे ।’ आफूले प्रहरीमा उजुरी गर्न खोज्दा कसैले साथ नदिएको गुनासो उनको छ ।

पदमपुरका स्थानीयहरू सो घटना देखेर पनि प्रहरीलाई खबर गर्न डराएको उनले बताइन् । कुकुरको हत्या गर्ने पुरुषहरू खराब प्रवृत्तिका भएकाले तिनीहरूलाई कसैले रोक्न नसकेको ती प्रत्यक्षदर्शीको भनाइ छ ।

प्रहरी बिट पदमपुरका अनुसार, घटनाको जानकारी केही समयअघि मात्र प्राप्त भएको छ । ‘हामीले भिडियो र घटनाबारे थाहा पाएका छौं । अनुसन्धानका लागि घटनास्थलमा टोली पठाउन लागेका छौं’ प्रहरीले अधिकारीले भने ।