
१३ भदौ, विराटनगर । नेकपा माओवादी केन्द्रभित्र फरक मत राख्दै आएका उपमहासचिव जनार्दन शर्माकै पक्षमा रहेका नेताहरू पनि मौन देखिएका छन् । बिहीबार कोशी प्रदेश कमिटीको सचिवालय बैठकमा यसअघि शर्माको पक्षमा खुलेका नेताहरू पनि मौन रहे ।
यसलाई कोशी प्रदेशका माओवादी नेताहरूले अर्थपूर्ण रुपमा लिएका छन् ।
यसअघि पार्टीको स्थायी समिति बैठकमा पनि शर्माका पक्षमा नेताहरू खुलेका थिएनन् । कोशी प्रदेश जनार्दन शर्माको पकट भएको प्रदेश हो ।
कोशी प्रदेश अध्यक्ष हर्कबहादुर नेम्वाङ, केन्द्रीय सदस्य तथा पूर्वमन्त्री शिवकुमार मण्डल, सुदन किराती, प्रदेश संसदीय दलका नेता इन्द्रबहादुर आङ्बोलगायत नेता शर्मा समूहका हुन् । तर, बिहीबारको प्रदेशसभा बैठकमा उनको पक्षमा कसैले बोलेनन् ।
बैठकमा बोल्ने ३३ जना वक्तामध्ये ४ जनाले पार्टीमा फरक विचारको सम्मान गर्न माग गरे, तर शर्माको नाम लिएनन् । सामाजिक सञ्जालमा शर्माको पक्षमा देखिने मण्डल र किँरातीले बैठकमा बोल्दै बोलेनन् । आङ्बोले पनि बोलेनन् । अध्यक्ष मिक्सो पनि बोलेनन् ।
‘बैठकमा बोल्ने ३३ जना मध्ये ३–४ जनाले पार्टी भित्र फरक मतको सम्मान गर्नुपर्ने माग गरे, तर शर्माको नाम नलिइ,’ बैठकमा सहभागी एक नेताले भने, ‘तर, पार्टी कमिटीको निर्णय नमानेकोमा उहाँ (शर्मा)प्रति आक्रोश थियो ।’
प्रदेश सदस्य असिम राई, श्रवण राय, अभिनाष मण्डलले पार्टीभित्र बहस हुनुपर्ने धारणा राखेका थिए ।
माओवादी केन्द्रको तराई मधेश हुलाकी राजमार्ग केन्द्रीत अभियानका क्रममा यात्रा छाडेर गत चैत ८ गते कोशी प्रदेश आएका जनार्दन शर्माले विराटनगर हुँदै ताप्लेजुङसम्मको यात्रा गरेको थियो ।
पार्टीको अभियान छाडेर गुट विस्तार गर्न आएको भन्दै प्रदेश सचिवालय सदस्य मदन चुँडालले ‘पूर्वतिर मुसाको चमत्कारिक अभियान’ भन्दै फेसबुक स्टाटस लेखेका थिए ।
शर्मा अर्थमन्त्री हुँदा उनीमाथि ‘मुसा’को ट्याग लागेको थियो । पार्टी उपमहासचिवलाई लक्षित गरी स्टाटस लेखेको भन्दै २७ चैतमा प्रदेश कमिटीले चुँडाललाई स्पष्टीकरण सोध्ने निर्णय गरेको थियो । यो विवाद सार्वजनिक भएपछि प्रदेश कमिटी पछि हटेको थियो ।
बिहीबारको सचिवालय बैठकमा शर्माको गुटमा रहेका प्रदेश अध्यक्ष लिम्बूले प्रदेशमा गुटउपगुट नरहेको बताएका थिए ।
‘स्थानीय अन्तरविरोधका आधारमा साथीहरुबीच केही असमझदारी छन्, तर गुटको प्रभाव छैन भन्नुभएको थियो,’ अध्यक्ष मिक्सोको भनाइ उद्धृत गर्दै ती नेताले भने, ‘केन्द्रले समूहगत स्वार्थलाई नियन्त्रण गर्नुपर्छ भनेका कारण हामीले त्यसलाई अघि बढ्न दिएका छैनौं ।’
बैठकमा प्रचण्ड पनि शर्माप्रति केही नरम देखिएका थिए । उनले पार्टीभित्र अन्तरविरोध हुनु सामान्य रहेको पनि बताए ।
प्रतिक्रिया 4