प्रचण्डले भने- महाधिवेशनअघि कसैसँग एकता भइहालेमा चिज अर्कै ढंगले जान्छ

८ असोज, काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले कसैसँग पार्टी एकता भइहालेमा आगामी महाधिवेशन नहुने बताएका छन् ।

यदि एकता नभएमा आगामी मंसिरमा महाधिवेशन गरेर नयाँ नीति र नेतृत्व चयन गर्ने उनको भनाइ छ ।

आज बसेको स्थायी कमिटीको बैठकमा अध्यक्ष प्रचण्डले समसामयिक राजनीतिक अवस्था र पार्टी संगठनका विषयमा जानकारी गराएका थिए ।

त्यसक्रममा विभिन्न दलहरुसँग पार्टी एकताको प्रयास पनि भइरहेको उनले बताएको स्रोत बताउँछ ।

स्रोतका अनुसार नेकपा माओवादीले एकीकृत समाजवादीका अध्यक्ष माधव कुमार नेपाल लगायतसँग पार्टी एकताको प्रयासमा छलफल चलाइरहेको स्रोत बताउँछ ।

बैठक स्रोतले भन्यो, ‘महाधिवेशनअघि कसैसँग पार्टी एकता भइहालेमा चिज अर्कै ढंगले जान्छ भनेर अध्यक्ष प्रचण्डले भन्नुभएको छ ।’ प्रचण्डको यो अभिव्यक्तिले पार्टी महाधिवेशन आगामी मंसिरमै हुन्छ कि हुँदैन भन्नेमा शंका पैदा गरेको ती नेताको भनाइ छ ।

तर बैठकपछि नेकपा माओवादी केन्द्रका प्रवक्ता अग्नि सापकोटाले दिएको जानकारी अनुसार आगामी मंसिरमा महाधिवेशन गर्नुअघि अध्यक्ष प्रचण्डले सबै पार्टी कमिटी भंग गर्ने बताएका छन् ।

पार्टी कमिटी भंग भएपछि प्रचण्डको नेतृत्वमा महाधिवेशन आयोजक समिति बन्ने उनले बताए ।

त्यसका लागि माओवादी केन्द्रले असोज ९ गते काठमाडौंमा केन्द्रीय समितिको बैठक बोलाएको छ ।

सो बैठकले औपचारिक रुपमा केन्द्रीय कमिटी भंग गरेर महाधिवेशन आयोजक समिति गठनको निर्णय गर्ने नेताहरु बताउँछन् ।