बागमती किनारका स्थानीयले छाड्न थाले बस्ती (तस्वीरहरू)

१८ असोज, काठमाडौं।अविरल वर्षाले बागमती नदीमा आएको बाढी बस्तीमा पस्न थालेपछि बागमती किनारका स्थानीयहरू बस्ती छाड्न  थालेका छन् ।

थापाथली, टेकु दोभान र बल्खुका स्थानीयहरु आफ्ना सामान बोकेर घर छोड्न थालेका हुन् ।

गतवर्ष आएको बाढीका कारण पनि निकै क्षति बेहोरेको बताएका उनीहरु यसवर्ष पहिला नै आफूहरुले भाग्ने पूर्वतयारी गरेको बताउँछन् ।

अहिले नभागेकाहरु भने बाढी बस्तीभित्र छिर्नासाथ घर छोड्न सामान पोको पारेर तयारी अवस्थामा रहेको बताए ।

‘कतिपय निस्किरहनुभएको छ । हामीचाहिँ केहीबेर हेर्छौ । भाग्नको लागि सबै तयारी अवस्थामा छौँ । आवश्यक सामान पोको पारेर राखेका छौँ,’ उनले भने ।

यस्तै थापाथलीका सुकुम्बासी बस्तीका बासिन्दालाई भने नजिककैको विद्यालयमा सार्ने तयारी गरिएको छ ।

थापाथलीमा बस्ती नजिकै रहेको विश्व निकेतन स्कुलमा बस्तीबासीलाई सार्ने तयारी रहेको काठमाडौं महानगर प्रहरी उपरिक्षक विष्णु जोशीले अनलाइनखबरलाई बताए ।

‘विश्व निकेतनमा सार्ने तयारी रहेको छ । हामी यहाँ काम गर्दै छौँ । बनाउँदै छौँ,’ जोशीले भने, ‘थापाथलीका बासिन्दालाई तपाईंहरु यता सर्नुपर्छ भनेका छौँ । उहाँहरुले पनि त्यसैगरी तयारी गरिरहनुभएको छ । कतिपय आफैँ बस्न थाल्नुभएको छ ।’

हेर्नुहोस थप तस्वीरहरू :