कुनै दलसँग पनि एकताको टुंगो लागेको छैन : माओवादी केन्द्र

७ कात्तिक, काठमाडौं । नेकपा माओपादी केन्द्रले पार्टी एकताका लागि विभिन्न पक्षसँग छलफल भएको भए पनि एकताबारे कुनै पनि विषय टुंगो नलागेको प्रष्ट पारेको छ ।

महाधिवेशन आयोजक समितिका संयोजक पुष्पकमल दाहाल प्रचण्डको सचिवालयले विभिन्न सञ्जाल र मिडियामा आएका समाचारहरूमा सत्यता नभएको बताएको छ ।

विशेषगरी नेकपा एकीकृत समाजवादीसँग आगामी निर्वाचनमा सँगै जानेगरी एकताको प्रक्रिया अघि बढाइएको समाचारहरू सार्वजनिक भएका थिए ।

तर, कुनै पनि दलसँग एकताको विषयमा अन्तिम निर्णय नलागेको प्रचण्डको सचिवालयले जनाएको छ ।

‘कुनै पनि दलसँग एकता गर्ने लगायतका विषयमा अन्तिम निर्णय र टुंगो लागिसकेको छैन । विभिन्न समयमा नेपाली जनताको अगुवाईमा भएका क्रान्ति र संघर्षहरुलाई रक्षा गर्दै बाँकी कार्यभार पुरा गर्न एकता अनिवार्य शर्त रहेको नेकपा (माओवादी केन्द्र)को ठहर छ,’ सचिवालयले भनेको छ ।