विप्लवले प्रस्ताव गरे दलको नाम- कम्युनिस्ट पार्टी नेपाल

News Summary

Generated by OK AI. Editorially reviewed.

नेत्रविक्रम चन्द (विप्लव)ले पार्टीको नाम कम्युनिस्ट पार्टी नेपाल प्रस्ताव गरी दल दर्ताका लागि निर्वाचन आयोगमा निवेदन दिएका छन्।
प्रवक्ता खड्गबहादुर विश्वकर्माले आगामी प्रतिनिधि सभाको चुनावमा भाग लिन दल दर्ताको निवेदन दिएको बताए।
निर्वाचन आयोगले निवेदन अध्ययन गरी दलको नाम पाउने वा नपाउने निर्णय गर्नेछ र हाल १२४ दल दर्ता भइसकेका छन्।

११ कात्तिक, काठमाडौं । नेत्रविक्रम चन्द (विप्लव)ले पार्टीको नाम कम्युनिस्ट पार्टी नेपाल प्रस्ताव गरेका छन् । यो प्रस्तावलाई पार्टीबाट अनुमोदन गराएर उनले निर्वाचन आयोगमा दल दर्ताका लागि नेताहरूलाई पठाएका हुन् ।

नेतारू सन्तोष बुढामगर, प्रवक्ता खड्गबहादुर विश्वकर्मा कर्णजित बुढा लगायतका नेताहरुले निर्वाचन आयोग पुगेर यो नामको पार्टीको दल दर्ताको निवेदन दिएका थिए ।

प्रतिनिधि सभाको चुनाव आगामी फागुन २१ गतेका तय भएको छ । त्यसका लागि दल दर्ताको प्रमाणपत्र लिइसक्नुपर्ने समयसीमा यही कात्तिक ३० गतेसम्म छ । त्यसअगावै दल दर्ताको निवेदन दिएका हुन् ।

दल दर्ताको निवेदन दिएपछि प्रवक्ता खड्गबहादुर विश्वकर्माले आगामी चुनावमा भाग लिने गरी दल दर्ताको निवेदन दिइएको बताए ।

नेपालको राजनीतिक आन्दोलनमा आफ्नो पार्टीले चुनावमा भाग लिएर अगाडि बढ्न खोजेको उनले बताए ।

अब प्राप्त निवेदनउपर आयोगले अध्ययन गर्नेछ । त्यसपछि प्रस्ताव गरे अनुसारको नाम पाउने वा नपाउने, अन्य विषयमा के हुने भनेर निर्णय दिनेछ । आयोगले निर्णय दिएपछि दलले आधिकारिता पाउनेछ ।

निर्वाचन आयोगमा यसअघि नै १२४ वटा दल दर्ता छन् । यो सहित १७ वटा दलले नयाँ दल दर्ताका लागि निवेदन दिएका छन् ।