गाजामा इजरायली सेनाको आक्रमणमा मृत्यु हुनेको संख्या १०४ पुग्यो

१२ कात्तिक, काठमाडौं । गाजामा इजरायलले मंगलबार राति गरेको आक्रमणमा मृत्यु हुनेको संख्या १०४ पुगेको छ ।

 हमासद्वारा सञ्चालित स्वास्थ्य मन्त्रालयले मंगलबार राति इजरायली सेनाले गरेको आक्रमणमा १०४ मृत्यु भएको पुष्टि गरेको हो ।

गाजाको स्वास्थ्य मन्त्रालयका अनुसार कूल १०४ मृतकमध्ये ४६ जना बालबालिका र २० जना महिला  समेत छन् । घटनामा २५० जनाभन्दा धेरै घाइते भएका छन् ।

इजरायली सेनाले दर्जनौं आतंकवादीको अड्डालाई निशाना बनाइएको दाबी गरेको छ । अमेरिकी राष्ट्रपति डोनाल्ड ट्रम्पको शान्ति योजना प्रस्ताव अनुसार इजरायल र गाजामा सक्रिय हमासबीच युद्धविराम सम्झौता भएको थियो ।

इजरायली रक्षामन्त्री इजरायल काट्जले हमासले इजरायली सैनिकमाथि आक्रमण गरेको र बन्धकको शव फिर्ता गर्ने मामिलामा तय भएको शर्तको उल्लघंन भएको दाबी गरेका बीबीसीले जनाको छ ।

तर, हमासले भने पछिल्लो आक्रमणमा आफ्नो कुनै भूमिका नभएको बताउँदै युद्धविरामका लागि पूर्णरूपमा प्रतिबद्ध रहेको प्रतिक्रिया दिएको छ ।

अमेरिकी राष्ट्रपति ट्रम्पले समेत कुनै पनि कुराले युद्धविरामलाई खतरामा नपार्ने प्रतिक्रिया जनाएका छन् ।

ट्रम्पले भने, ‘जब इजरायली सैनिकमाथि निशाना साँधिन्छ भने इजरायलले जवाफ दिनुपर्छ ।’

मंगलबार राति इजरायली सेनाले गरेको आक्रमणमा गाजा सिटी, बेत लाहिया, बेरेज, नुसरत र खान युनिस क्षेत्रका घर, विद्यालय र आवासीय भवनहरूमा क्षति पुगेको छ ।

गाजा सिटीका प्रत्यक्षदर्शीले बताएअनुसार विस्फोटले कयौं आवासीय घर थर्किएका थिए भने त्यसपछि आगो र धुँवाको मुस्लो उडेको देखिएको थियो ।

यसअघि मंगलबार बेलुकी इजरायली प्रधानमन्त्री बेन्ज्यामिन नेतन्याहुको कार्यालयबाट जारी संक्षिप्त बयानमा सेनालाई भीषण आक्रमणका लागि निर्देशन दिइएको उल्लेख थियो । तर, आक्रमणको निर्देशन दिनुको कारण भने खुलाइएको थिएन ।