‘११ औं महाधिवेशन ४० दिनको तयारीमा गरिएको हो, अहिले पनि गर्न सकिन्छ’

२० कात्तिक, काठमाडौं ।  नेपाली कांग्रेसका नेता अर्जुननरसिंह केसीले छोटो समयको तयारीमा पनि महाधिवेशन गर्न सकिने बताएका छन् । संस्थापन पक्षका कतिपय नेताले समय अभावले चुनाव अघि महाधिवेशन गर्न नसकिरहेको बताइरहेको बेला केसीले विगतको उदाहरण केन्द्रीय समितिमा देखाएका हुन् ।

नियमित अधिवेशनको माग गर्दै नेता केसीले भने, ‘११ औंं महाधिवेशन, मात्रै ४० दिनको तयारीमा सुम्पन्न भएको हामीकहाँ उदाहरण छ । असाधारण परिस्थितिमा महाधिवेशन हुन सक्दैन भन्ने बहाना निरर्थक छ ।’

त्यसबेलाको समय स्मरण गर्दै नेता केसीले अन्तर्राष्ट्रिय सम्मेलन केन्द्र बुक गरिए पनि तत्कालीन शाही सत्ताले उक्त स्थल उपलब्ध नगराएको बताए ।

शाही सत्ताले सम्मेलन केन्द्र उपलब्ध नगराएपछि उद्घाटन जावलाखेलस्थित चिडियाखाना अगाडिको मैदानमा र बन्द सत्रहरू केन्द्रीय कार्यालय (सानेपा) को प्रांगणमा भएको जानकारी गराए ।

पार्टी यथास्थितिमा राखेर निर्वाचनमा जानु घातक हुने उनले बताए । महामन्त्री गगन थापाले ल्याएको प्रस्ताव अनुसार नियमित महाधिवेशन नगर्ने हो विशेषमा जानुपर्ने उनलेब बताए ।

‘५४ प्रतिशत सदस्यको विशेष महाधिवेशनको सामूहिक मागलाई न्यायोचित सम्बोधन गर्नु केन्द्रीय कार्यसमितिको अनिवार्य वैधानिक दायित्व हो । महाधिवेशनको समयावधि सिद्धियो भन्ने कुरा पनि सुनिन्छ । त्यसबाट निर्वाचित यो केन्द्रीय कार्यसमिति कुन आधारमा जीवित छ ?,’ केसीले भने, ‘अर्को महाधिवेशन नहुञ्जेलसम्म यो जीवित रहन्छ भन्ने हेक्का राख्नु जरुरी छ । आगामी चुनावको बारेमा र मुलुकको पेचिलो परिस्थितिमा कांग्रेसको अबको मार्गचित्र सार्वजनिक गर्न पार्टीको नियमित वा विशेष महाधिवेशनको अनिवार्य आवश्यकता छ ।’