सौगात मल्लले चन्द्रागिरीबाट थाले ‘बब डाई’ को छायांकन

दशकपछि ‘मोक्ष’ निर्देशकको पुनरागमन

अनलाइनखबर

२०८२ मंसिर ४ गते २०:१४

News Summary

Generated by OK AI. Editorially reviewed.

अभिनेता सौगात मल्लले निर्देशक प्रवीण श्रेष्ठको फिल्म 'बब डाई' को छायांकन काठमाडौंको चन्द्रागिरीबाट सुरु गरेको छ।
निर्देशक श्रेष्ठले 'बब डाई' मा कीर्तिपुरको कथा समेटिने र सौगात मल्लले मुख्य भूमिका निभाउने बताउनुभएको छ।
फिल्ममा सिम्रन पन्त, सन्तोष पन्त, विशाल पहाडी लगायतका कलाकारको अभिनय रहनेछ र छायांकन डेढ महिनासम्म चल्नेछ।

काठमाडौँ । अभिनेता सौगात मल्लले आगामी फिल्म ‘बब डाई’ को छायांकन थालेका छन् । सुनिल मानन्धरले निर्माण गर्ने यो फिल्मलाई दृश्य सम्पादक समेत रहेका प्रवीण श्रेष्ठले निर्देशन गर्दैछन् ।

मानन्धर र श्रेष्ठले दशकअघिको हिट म्युजिकल ड्रामा ‘मोक्ष’ मा सहकार्य गरेका थिए । निर्देशक श्रेष्ठको पुनरागमन यतिबेला सम्भव भएको हो ।

सोमबारदेखि काठमाडौंको चन्द्रागिरीबाट छायांकन सुरु गरिएको विवरणहरूमा जनाइएको छ । आगामी डेढ महिनासम्म कीर्तिपुर, चन्द्रागिरी आसपासमा फिल्म खिचिने भएको छ ।

निर्देशक श्रेष्ठका अनुसार उनको यो पुनरागमन फिल्ममा कीर्तिपुरको कथा हुनेछ । शीर्षकबारे श्रेष्ठ भन्छन्, ‘खासमा बब डाई भनेको बब दाई हो । नेवारी टोनमा दाईलाई डाई भनिने भएकाले नाममा त्यसरी राखेका हौं ।’

उनका अनुसार ’बब डाई’को भूमिकामा सौगात देखिनेछन् ।

फिल्ममा सिम्रन पन्त, सन्तोष पन्त, विशाल पहाडी, प्रमोद अग्रहरी, कामेश्वर चौरासिया, कुशल पोखरेल, यमन श्रेष्ठ, कृष्णभक्त महर्जन, गीता अधिकारी, भिन्तुना जोशी, नितेश तन्डुकार, मनोज महर्जन र बालकलाकार अग्रिम पण्डितको अभिनय हुनेछ ।

मानन्धरले राजेश घिमिरे र रोशन भट्टराईसँग निर्माणा सहकार्य गरेका छन् । रविन्द्र प्रजापती कार्यकारी निर्माता हुन् ।