राजनीतिमा होमिएकी सेलिब्रेटी रीमा, भन्छिन् : देश बनाउन साथ दिनूस

काठमाडौं । टिभी कार्यक्रम प्रस्तोता एवं अभिनेत्रीको रुपमा चिनिएकी रीमा विश्वकर्माको करिअरमा दोस्रो चरण सुरु भएको छ ।

उनी कूलमान घिसिङ समर्थित दल ‘उज्यालो नेपाल पार्टी’ बाट राजनीतिमा होमिएकी छिन् । बुधबार आयोजित पार्टीको घोषणा सभामा बोल्दै उनले देशले परिणाममुखी नेतृत्व खोजिरहेको बताइन् ।

घिसिङको कार्यशैलीबाट आफू प्रभावित भएको उनले बताइन् ।

कार्यक्रममा उनले भनिन्, ‘जब ममा राजनीतिक चेत आयो, यो देशमा सरकारमा बसेर कसैको नेतृत्वले मेरो दैनिकी र मेरो जीवनशैलीमा प्रत्यक्ष प्रभाव पारेको थियो भने त्यो लोडसेडिङ अन्त्यको निर्णय थियो । मैले त्यसैदिन कुलमान घिसिङलाई अगुवा मानेको थिएँ ।’

घिसिङले घर-घरमा उज्यालो ल्याएको भन्दै आफूहरू देश उज्यालो बनाउने अभियानमा लागेको रीमाले बताइन् ।

‘१८ घण्टे लोडसेडिङलाई हटाएर उहाँले तपाईं र हाम्रो घरमा त उज्यालो ल्याइसक्नुभयो । अब उज्यालो नेपाल पार्टीमार्फत देशको भविष्य उज्यालो बनाउने महाअभियानमा लागेका छौं’ उनले भनिन् ।

टेलिभिजन पत्रकारिताको पृष्ठभूमिबाट अघि बढेकी रीमाले थुप्रै म्युजिक भिडियो, केही फिल्म र केही टिभी कार्यक्रम समेत होस्ट गरेकी छिन् ।

‘दुई दशकदेखि म प्रत्यक्ष वा अप्रत्यक्ष रूपमा यो समाजसँग जोडिई नै रहेकी छु । अब मैले उठाउने विषय, उठाउने आवाज र म उभिने मञ्च आफ्नो व्यक्तिगत निजी सफलताका लागि मात्र नभएर आवाजविहीनहरूको आवाज बन्न प्रण गर्नेछु’ उनले भनिन् ।

उनी भन्छिन्, ‘महिलाहरूको प्रतिनिधित्व गर्न, युवाहरूले उठाएका मुद्दालाई स्थापित गर्न र राज्यले समान भनेका अल्पसंख्यक तथा उपेक्षित समुदायको अधिकारलाई व्यवहारमा उतार्नका लागि उपयोग गर्ने प्रण गरेको छु ।’

आफ्नो दललाई देश निर्माणको अभियानमा साथ दिन उनको आग्रह छ ।