नदीशको नयाँ किताबलाई लेखकहरूले भने : एक्काइसौं शताब्दीका अस्तित्ववादी कविता

News Summary

Generated by OK AI. Editorially reviewed.

कवि नदीशको कविता सङ्ग्रह 'हिउँद' राजधानीको शिल्पी थिएटरमा लोकार्पण भएको छ।
पवित्रा खड्का, डा. मुस्कान पोख्रेल, उमेश बलाल मगर र वसन्त बस्नेतले कविता वाचन गरेका थिए।
नदीशका कवितालाई रिदम कँडेलले संगीतमा प्रस्तुत गरेका थिए र पुस्तक बुकहिलले बजारमा ल्याएको छ।

२२ पुस, काठमाडौं । कवि नदीशको कविता सङ्ग्रह हिउँद लोकार्पण भएको छ । राजधानीको शिल्पी थिएटरमा आयोजित कार्यक्रममा पुस्तकको लोकार्पण गरिएको हो । नाट्यअभिनेत्री पवित्रा खड्का, कवि डा. मुस्कान पोख्रेल, पर्यावरण-अध्येता उमेश बलाल मगर र लेखक वसन्त बस्नेतका साथमा कवि नदीशका पिता गिरिप्रसाद भट्टराईले पुस्तक लोकार्पण गरेका हुन् ।

रिदम कँडेलको साङ्गीतिक पार्श्वध्वनिमा खर्बुजा, झरी पर्दा, कोकुन र रोकिन मन छ- नजाऊ भनिदिने कोही छैन शीर्षकका कविता पवित्रा खड्का, डा. मुस्कान पोख्रेल, उमेश बलाल मगर र वसन्त बस्नेतले वाचन गरे ।

त्यसैगरी कवि नदीशले नदीश यस्तो हुनु, अचेत सभ्यताको माझबाट, बिरामी र म फेरि आउँछु शीर्षकका कविता वाचन गरेका थिए । साथै, रिदम कँडेलले नदीशको एउटा कवितालाई गायनमा प्रस्तुत गरेका थिए ।

सङ्गीत र कविताको फ्युजनमा समारोह काव्यिक बनेको थियो । नदीशले लेखेका कविता यस वर्षकै महत्वपूर्ण उपहार भएको भन्दै लेखकहरुले एक्काइसौं शताब्दीको व्यस्तता, प्रविधिले ल्याइदिएको अवसर र संकटबीच च्यापिएका अस्तित्ववादी कविता भनी व्याख्या गरेका छन् ।

उनीहरुले पर्यावरणको गहिरो चेत बोकेका कविता पढिनुपर्ने दर्जाका रहेको पनि भनेका छन् । नदीशका पछिल्ला कविताहरूको सङ्ग्रह ‘हिउँद’लाई बुकहिलले बजारमा ल्याएको हो ।