‘झलिको’ गायक बने लोकप्रिय नेपाली संगीतकर्मी, यस्तो छ शीर्ष १० ‘भाइब्रेट’ सूची

'झलिको' म्युजिक भिडियोमा गायक तथा संगीतकार अर्जुन सापकोटा

News Summary

Generated by OK AI. Editorially reviewed.

गायक अर्जुन सापकोटा डिसेम्बर महिनाको लोकप्रिय नेपाली संगीतकर्मी बनेका छन्।
उनको गीत 'झलिको' युट्युबमा १ करोड ९५ लाखभन्दा बढी पटक हेरिएको छ।
भाइब्रेटको सूचीमा सान्नु कुमार दोस्रो र सुशान्त केसी तेस्रो स्थानमा छन्।

काठमाडौं । धन्यवाद- ‘झलिको’ लाई । यो गीतको मद्दतमा गायक अर्जुन सापकोटा गत महिनाका लोकप्रिय नेपाली संगीतकर्मी बनेका छन् । म्युजिक डेटा प्लाटफर्म ‘भाइव्रेट’ को डिसेम्बर महिनाको सूचीमा गायक सापकोटा ४९२.४ के अंकसहित लोकप्रिय नेपाली संगीतकर्मी बनेका हुन् ।

उक्त प्लाटफर्मले महिनैपिच्छे यो सूची निकाल्छ । सापकोटाद्वारा संगीतबद्ध गीत ‘झलिको’ अहिले सामाजिक सञ्जालमा निकै रुचाइएको छ । युट्युबमा मात्र यसलाई १ करोड ९५ लाखभन्दा धेरै पटक हेरिएको छ । टिकटकमा पनि हजारौंले यो गीतमाथि भिडियो बनाइरहेका छन् ।

लोकशैलीमा तयार पारिएको उक्त गीतमा सापकोटाको संगीत छ । गायनमा उनलाई मेलिना राई र समीक्षा अधिकारीले साथ दिएका छन् । सन्तोष सापकोटाका शब्द गीतमा छन् ।

‘भाइब्रेट’ को उक्त सूचीको दोस्रो स्थानमा राजविराजका मैथिली र भोजपुरी गायक सान्नु कुमार छन् । नेपालको तराई र मधेश क्षेत्रमा सान्नुको लोकप्रियता ब्यापक छ । ४४४.७ के अंकसहित उनी दोस्रो स्थानमा छन् ।

तेस्रो स्थानमा सुशान्त केसी, चौंथोमा टंक बुढाथोकी र पाँचौमा बालेन छन् । त्यसपछि शीर्ष १० मा क्रमशः सज्जनराज वैद्य, तृष्णा गुरुङ, भिटेन, प्रकाश दूतराज र मेलिना राई छन् ।

‘भाइब्रेट’ ले कलाकार, प्रबन्धक, लेबलका लागि प्रमुख स्ट्रिमिङ सेवा, सामाजिक सञ्जाल र रेडियोबाट रियल टाइम डेटा संकलन गर्छ ।