चुनावमा जनताले नपत्याएका उद्योगी-व्यवसायी

News Summary

Generated by OK AI. Editorially reviewed.

२१ फागुनमा सम्पन्न प्रतिनिधिसभा निर्वाचनमा धेरै सफल उद्योगी र व्यवसायीहरूले मतदाताको साथ पाउन सकेनन्।
नेपाली कांग्रेसका डलर अर्बपति विनोद चौधरी ३५ हजार मतान्तरले पराजित भएका छन्।
धादिङ, रुपन्देही, पर्सा लगायतका क्षेत्रका व्यवसायी उम्मेदवारहरू पनि विभिन्न दलका प्रतिद्वन्द्वीसँग पराजित भएका छन्।

२५ फागुन, काठमाडौं । नेपाली राजनीतिको एउटा विशेषता बन्दै गएको छ- सफल उद्योगी र व्यवसायीहरूको सक्रिय राजनीतिमा प्रवेश । २१ फागुनमा सम्पन्न प्रतिनिनधिसभा निर्वाचनमा पनि यो प्रवृत्ति स्पष्ट देखियो ।

आर्थिक क्षेत्रमा आफ्नो दरिलो पहिचान बनाएका र मुलुकको अर्थतन्त्र चलायमान बनाउन भूमिका खेलेका दर्जनौं ‘कर्पोरेट’ अनुहारहरू यसपालि विभिन्न राजनीतिक दलको झन्डा बोकेर प्रत्यक्षतर्फबाट चुनावी मैदानमा उत्रिएका थिए ।

तर, यसपालि चुनावमा ठूला भनिएका र आर्थिक रूपमा शक्तिशाली मानिएका धेरै उद्योगी-व्यवसायीहरूले मतदाताको मन जित्न सकेनन् ।

नेपालका एकमात्र डलर अर्बपति उद्योगपति विनोद चौधरी नेपाली कांग्रेसका तर्फबाट नवलपरासी बर्दघाट सुस्ता पश्चिम क्षेत्र नम्बर १ बाट उम्मेदवार बनेका थिए । अघिल्लो निर्वाचनमा उनी सोही क्षेत्रबाट निर्वाचित भएका थिए ।

तर, यसपालि भने उनलाई मतदाताले साथ दिएनन् । उनले ३५ हजार मतान्तरले हारे । चौधरी राष्ट्रिय स्वतन्त्र पार्टी (रास्वपा) का विक्रम खनालसँग पराजित भए । रास्वपाका खनालले ४५ हजार २ सय ४१ मत पाउँदा चौधरीले ९ हजार ५ सय २ मतमै चित्त बुझाए ।

यस्तै धादिङ क्षेत्र नम्बर २ मा कांग्रेसबाट पर्यटन व्यवसायी रमेशप्रसाद धमला उम्मेदवार थिए । उनी ट्रेकिङ एजेन्सिज एसोसिएसन अफ नेपाल (टान) का पूर्वअध्यक्ष पनि हुन् । पहिलो पटक निर्वाचनमा होमिएका उनलाई रास्वपाका बोधनारायण श्रेष्ठले हराए ।

श्रेष्ठले २६ हजार १ सय ४३ मत ल्याएर निर्वाचित हुँदा धमलाले २० हजार २ सय ७७ मत ल्याए । निर्वाचित श्रेष्ठ र धमलाबीचको मतान्तर ५ हजार ८ सय ६५ छ ।

त्यस्तै रुपन्देही क्षेत्र नम्बर २ मा यशोदा फुड्सका अध्यक्ष चुन्नप्रसाद शर्मा पौडेल कांग्रेसबाट उम्मेदवार बनेका थिए । सोना प्याकेजिङ तथा होटल स्याफ्रोनका अध्यक्ष समेत रहेका उनी रास्वपाका उम्मेदवार सुलभ खरेलसँग पराजित भए ।

खरेलले ५६ हजार ५ सय ५० मत पाएर निर्वाचित हुँदा पौडेलले ९ हजार ३ सय ९२ मत मात्रै ल्याए ।

यस्तै पर्सा क्षेत्र नम्बर-१ बाट कांग्रेस उम्मेदवार उद्योगी अनिलकुमार रुँगटा पनि पराजित भएका छन् । उनी जगदम्बा इन्टरप्राइजेज प्रालिका निर्देशक हुन् ।

रुँगटा पनि रास्वपाका उम्मेदवार बुद्धिप्रसाद पन्त (हरि) सँग पराजित भए । पन्तले २७ हजार २ सय ७४ मत प्राप्त गर्दा रुँगटाले ११ हजार ८ सय ८५ मत प्राप्त गरेका छन् ।

यसैगरी कपिलवस्तु क्षेत्र नम्बर ३ मा कांग्रेस त्यागेर एमालेबाट व्यवसायी वीरेन्द्रप्रसाद कनौडिया उम्मेदवार बनेका थिए । उनी लुम्बिनी सुगर मिल्सका अध्यक्ष पनि हुन् । साथै, उनको अन्य उद्योग तथा व्यवसायमा पनि लगानी छ ।

कनौडिया कपिलवस्तु-३ मा कांग्रेसका अभिषेकप्रताप शाहसँग पराजित भए । शाह २३ हजार ५ सय ३५ मत ल्याएर विजयी हुँदा एमालेका कनोडियाले १४ हजार ७ सय ६३ मत ल्याए ।

कांग्रेसले झापा क्षेत्र नम्बर ३ मा नेपाल अलैँची व्यवसायी संघका पूर्वअध्यक्ष राजेन्द्र घिमिरेलाई उम्मेदवार बनाएको थियो ।

घिमिरे पनि रास्वपाका उम्मेदवार प्रकाश पाठकसँग पराजित भएका छन् । उनले ८ हजार १ सय १९ मत मात्रै पाएका छन् । पाठकले ३८ हजार ६ सय ७४ मत ल्याएका छन् ।

यस्तै पर्यटन व्यवसायी तथा पर्यटन बोर्डका पूर्वसदस्य कृष्ण रिजाल पनि धादिङ क्षेत्र नम्बर १ मा कांगे्रसबाट उम्मेदवार थिए । धादिङ–१ मा रास्वपाकी आशिका तामाङ विजयी भएकी छिन् । तामाङले ३९ हजार १ सय २८ पाइन् । रिजालको मत १० हजार ८० मात्रै छ ।

यस्तै नेपाली कम्युनिस्ट पार्टी (नेकपा) बाट काठमाडौं-८ को उम्मेदवार बनेका थिए व्यवसायी सुमन सायमी । उनी नेपालकै पुरानोमध्येको मिठाई पसल कालीमाटीस्थित ‘स्विट केभ’ का सञ्चालक हुन् ।

उनी रास्वपाका विराजभक्त श्रेष्ठसँग पराजित भए । श्रेष्ठले २४ हजार ५ सय ९२ मत ल्याउँदा सायमीले ३ हजार २ सय १७ मत पाए । सायमीको जमानत जफत भएको छ ।

यसैगरी राइड सेयरिङ एप ‘पठाओ’ का सञ्चालक असिममानसिंह बस्न्यातले काठमाडौं क्षेत्र नम्बर १ बाट स्वतन्त्र उम्मेदवारी दिएका थिए । तर, उनलाई ५० मतदाताले मात्र पत्याए ।

त्यस्तै कैलाली-२ मा कांग्रेसका उम्मेदवार नेपाल यातायात व्यवसायी राष्ट्रिय महासंघ अध्यक्ष विजयबहादुर स्वाँर रास्वपाका केपी खनालसँग पराजित भए ।

ऊर्जा तथा मेडिकल व्यवसायी डा. सुनिलकुमार शर्मा मोरङ-३ मा पराजित भए । मुक्तिनाथ विकास बैंक र मुक्तिनाथ कृषि कम्पनीका पूर्वअध्यक्ष भरतराज ढकाल स्याङ्जा-१ मा पराजित भए ।

यसैगरी घरजग्गा व्यवसायी प्रेमबहादुर खत्री गोरखा-१ मा पराजित भए । म्यानपावर व्यवसायी तिलक रानाभाट पनि पराजित भएका छन् । भन्सार एजेन्ट तथा व्यवसायी केशव पाण्डेले हार बेहोरे ।

गुल्मी-२ मा व्यवसायी भुवन श्रेष्ठ, धनुषा-२ मा व्यवसायी उमाशंकर अरगरिया र उद्योगपति दीलिप अग्रवाल मोरङ-२ मा पराजित भए ।

त्यसैगरी पूर्वबैंकर मिनबहादुर गुरुङ स्याङ्जा-१, मनाङमा व्यवसायी छोपाङ गुरुङ र मोरङ-५ मा व्यवसायी मनोज अग्रवाल यसपालि चुनावमा असफल भए ।

दुग्ध व्यवसायी रामचन्द्र उप्रेती झापा-१, स्याङ्जा-२ मा व्यवसायी खिम थापा, झापा-४ मा म्यानपावर व्यवसायी एलपी साँवा लिम्बू, नवलपुर-१ मा उद्योगी भगिरथ सापकोटा र काभ्रे-१ मा पर्यटन व्यवसायी अमित लामा पराजित भए ।

यसैगरी बारा-४ मा उद्योगी किसान श्रेष्ठ, सिराहा-४ मा व्यवसायी डा. वीरेन्द्रप्रसाद महतो, स्याङ्जा-२ मा यातायात व्यवसायी भागवत मल्ल र पर्यटन व्यवसायी ज्योत्सना सैँजु काभ्रे-२ मा पराजित भए ।

म्यानपावर व्यवसायीहरू किरणकिशोर घिमिरे दाङ-२ र रनबहादुर राई इलाम-१, ऊर्जा व्यवसायी पार्वत गुरुङ दोलखा, पूर्वबैंकर झपट बोहरा अछाम-१ र काठ व्यवसायी प्रेमबहादुर आले कैलाली-५ मा पराजित भए ।