महावीरलाई प्रश्न गर्दा अभद्र व्यवहारमा समातिएर विकास हिरासतमुक्त

२९ फागुन, पोखरा । पोखरामा किताब बेचिरहँदा सांसद महावीर पुनलाई प्रश्न गर्दा भनाभन भएपछि अभद्र व्यवहारको अभियोगमा पक्राउ परेका विकास गुरुङ हिरासतमुक्त भएका छन् ।

२५ फागुनमा पृथ्वीचोकमा किताब बेचिरहेका महावीरसँग भनाभन गर्ने क्रममा अपमान भएको भन्दै आलोचना बढेपछि अनुसन्धानका लागि भन्दै प्रहरीले बुधबार गुरुङलाई पक्राउ गरेको थियो । प्रश्न गरेकै आधारमा पक्राउ गरिएको भन्दै आलोचनासमेत भइरहेको थियो ।

सांसद महावीर नै मुद्धा अगाडि बढाउन अनिच्छुक भएपछि थुनामुक्त गरिएको कास्की प्रहरी प्रमुख नवीन कार्कीले जानकारी दिए ।

‘पूर्वमन्त्री तथा सांसदलाई सार्वजनिक ठाउँमा अभद्र व्यवहार भएको भिडियो सार्वजनिक भएपछि सोधपुचका लागि बोलाएका हौं,’ एसपी कार्कीले भने, ‘माननीयज्यूले नै गल्ती महसुस गरिसकेपछि मुद्दा अगाडि बढाउन अनिच्छुक देखिनुभयो र उहाँले पनि गल्ती महसुस गरेपछि छाडेका छौं ।’

म्याग्दीबाट प्रतिनिधिसभा सदस्यमा जनताले नीति बनाउन जिताइसकेपछि पृथ्वीचोकमा किताब बेचिरहेका पुनसँग सांसदको काम किताब बेच्ने हो कि होइन भनेर सोधेको तर सोध्ने क्रममा आफूलाई रिस उठेको गुरुङले बताएका छन् ।

महावीरले पनि चर्केर जवाफ दिएपछि आफूलाई रिस उठेर बोलेको तर सांसदलाई अपमान गर्न हुँदैन थियो भन्ने पछि महसुस भएको विकासको भनाइ छ ।

कास्की प्रहरी प्रमुख कार्कीले के कारणले त्यति रिस उठेको रहेछ, सार्वजनिक ठाउँमा माननीयप्रति किन त्यस्तो व्यवहार भयो भनेर अनुसन्धानका लागि ल्याइएको तर सुनियोजित कुनै कारण नभएको र गल्ती महसुस गरेपछि छाडिएको बताए ।

महावीर पुनसँग सांसदको काम किताब बेच्ने हो भन्दै प्रश्न गरेका व्यक्तिबीच भनाभन हुँदै अपमानजनक व्यवहार भएको भन्दै प्रश्नसमेत उठेको थियो । महावीर र ती व्यक्तिबीच भनाभन हुँदै एकअर्काले ‘थुक्क’ भनेको भिडियो भाइरल बनेको थियो । महावीरमाथि अभद्र व्यवहार भएको भन्दै प्रहरी र सुरक्षामाथि पनि प्रश्न उठेपछि सोधपुछका लागि पोखरा वडा नम्बर १३ बाँझापाटन बस्ने वर्ष ४३ को विकास गुरुङलाई पक्राउ गरेको थियो ।

‘महावीर पुन, सम्झना, सपना र अविरल यात्रा’ नामक पुस्तक बिक्री गरिरहेको अवस्थामा विकासले महावीरलाई सांसदको काम किताब बेच्ने नभएको बताएका थिए भने त्यही क्रममा भनाभन हुँदै अपमानजनक व्यवहारसमेत भएको थियो । महावीरले कृषि औजार चलाउन किताब बेचेको बताएका थिए ।

‘तपाईंको काम यो होइन । कारखाना चलाउने मान्छे सांसद किन भएको त ? जनताले प्रत्यक्ष निर्वाचित गरेको मान्छेले किताब बेच्ने हो ?’ महावीरलाई उनले प्रश्न सोधेका छन्, ‘तपाईंको काम यो होइन, जनताले कुन म्यान्डेड दिएका छन्, त्यही गर्नु न ।’

जनताले कारखाना चलाउन म्यान्डेड दिएको महावीरले जवाफ फर्काएका थिए । उनलाई फेरि ती व्यक्तिले प्रश्न गर्छन्, ‘कारखाना चलाउने मान्छे किन सांसद उठेको त ?’ नोकझोंकै क्रममा विकासले महावीरलाई लक्षित गर्दै ‘थुक्क’ भनेका थिए भने महावीरले पनि त्यही शब्द फर्काएका थिए ।