मालपोत कार्यालय पर्साका तत्कालीन ४ अधिकृतसहित ८ जनाविरुद्ध भ्रष्टाचार मुद्दा

News Summary

Generated by OK AI. Editorially reviewed.

अख्तियार दुरुपयोग अनुसन्धान आयोगले मालपोत कार्यालय पर्साका चार मालपोत अधिकृतसहित आठ जनाविरुद्ध भ्रष्टाचार मुद्दा दायर गरेको छ।
आर्थिक वर्ष २०७०/७१ मा राजस्व चुहावट गरी २ करोड ९३ लाख ६८ हजार ५६५ रुपैयाँ बिगो रकम दाबी गरिएको छ।
मिश्रलाई ३८ लाख ८० हजार, बोगटीलाई १ करोड १० लाख, अर्याललाई २१ लाख र कुर्मीलाई ९९ लाख रुपैयाँ बिगो दाबी गरिएको छ।

१८ चैत, काठमाडौं । मालपोत कार्यालय पर्साका तत्कालीन चार जना मालपोत अधिकृतहरूसहित ८ जनाविरुद्ध अख्तियार दुरुपयोग अनुसन्धान आयोगले विशेष अदालत काठमाडौंमा भ्रष्टाचार मुद्दा दायर गरेको छ ।

मालपोत अधिकृतहरू हरिनारायण मिश्र, भूपबहादुर बोगटी, पदमप्रसाद अर्याल, सुरेन्द्रप्रसाद राव कुर्मीसहित ८ जनाविरुद्ध राजस्व चुहावट गरी भ्रष्टाचार गरेको आरोपमा अख्तियारले मुद्दा दायर गरेको हो ।

आर्थिक वर्ष २०७०/७१ मा रजिस्ट्रेसन फाँट ‘ग’ बाट उठेको रजिस्ट्रेसन बापतको २ करोड ९३ लाख ६८ हजार ५६५ रुपैयाँ राजस्व हिनामिना भएको देखिएकोले उनीहरूविरुद्ध मुद्दा दायर गरिएको आख्तियारको आरोपपत्रमा उल्लेख छ ।

अख्तियारले मिश्रलाई ३८ लाख ८० हजार ३६८, बोगटीलाई १ करोड १० लाख ६० हजार ५२४, अर्याललाई २१ लाख ३८ हजार १६९ र कुर्मीलाई ९९ लाख १० हजार ५२५ रुपैयाँ बिगो रकम दाबी गरेको छ ।

यसैगरी अख्तियारले तत्कालनी नायव सुब्बा स्व. किरणप्रसाद उपाध्यायको हकमा अंशियार छोराहरू राजकिशोरप्रसाद उपाध्याय, गौतमप्रसाद उपाध्याय, पशुपतिप्रसाद उपाध्याय र मुरारीप्रसाद उपाध्यायसँग २ करोड ९३ लाख ६८ हजार ५६५ रुपैयाँ बिगो दाबी गरेको छ ।