बालेनलाई बामदेवको खुलापत्र- ओलीलाई हिरासतबाट छुटाउनुहोस्

News Summary

Generated by OK AI. Editorially reviewed.

नेपाली कम्युनिस्ट पार्टीका केन्द्रीय सदस्य बामदेव गौतमले प्रधानमन्त्री बालेन्द्र शाहलाई केपी शर्मा ओलीलाई हिरासतबाट छुटाउन खुलापत्र लेखेका छन्।
गौतमले ७४ वर्षीय ओली वृद्ध र शारीरिक रुपमा अस्वस्थ भएको भन्दै रातारात घर घेरेर पक्राउ गर्ने शैली गलत भएको बताएका छन्।
उहाँले प्रधानमन्त्रीलाई ओलीलाई अपमानित गरी हिरासतमा राख्नुको कारण र प्रमाणित भएपछि मात्र कारबाही गर्नुपर्ने प्रश्न राखेका छन्।

२१ चैत, काठमाडौं । नेपाली कम्युनिस्ट पार्टीका केन्द्रीय सदस्य बामदेव गौतमले पूर्वप्रधानमन्त्री एवं नेकपा एमालेका अध्यक्ष केपी शर्मा ओलीलाई हिरासतबाट छुटाउन भन्दै प्रधानमन्त्री बालेन्द्र शाहलाई खुलापत्र लेखेका छन् ।

७४ वर्षीय ओली वृद्ध, शारीरिक रुपमा अस्वस्थ भएको भन्दै यो तहको सकसमा पर्नु उचित नभएको उनको भनाइ थियो ।

रातारात घर घेरेर एकाबिहानै पक्राउ गर्ने शैली गलत भएको भन्दै उनले उक्त गल्ती सच्याउन पनि प्रधानमन्त्री शाहलाई आग्रह गरेका छन् ।

‘केपी शर्मा ओलीका हकमा आकर्षित गरिएका वा गर्न खोजिएका कसुरलाई घटना, प्रमाण र कानुनले के भन्छ भन्ने कुराको परीक्षण पहिला हुनुपर्ने थियोे । त्यसो नगरी रातारात घर घेरेर, एकाबिहानै पक्राउ गर्ने शैली गलत थियो,’ गौतमले भनेका छन्, ‘म अनुरोध गर्दछु, ती गल्ती सच्याउनुहोला । एउटा वृद्ध, शारीरिक रुपमा पनि अस्वस्थ्य राजनीतिक व्यक्तिलाई यो तहको सकसमा पार्नु उचित छैन ।’

साथै, उनले प्रधानमन्त्री शाहसमक्ष पत्रमार्फत केही प्रश्न पनि राखेका छन् ।

‘म प्रश्न गर्न चाहन्छु कि, ७४ वर्षको बृद्ध अवस्थामा पुगेका नेकपा (एमाले) का अध्यक्ष केपी शर्मा ओलीजीलाई किन अपमानित हुने गरी हिरासतमा राख्नुहुन्छ ? उहाँलाई थुन्नका निम्ति जे–जे तथ्य जम्मा गरिएको छ, ती सबै अदालतबाट प्रमाणित भएपछि थुनेर कारबाही गर्नु भए हुन्न र ?,’ गौतमले भनेका छन् ।