सरकारको बारेमा बोल्न पटक्कै मन छैन, तर चुपचाप बस्न पनि सकिएन : नेकपा सांसद राई

News Summary

Generated by OK AI. Editorially reviewed.

नेकपाकी सांसद जयन्तीदेवी राईले सरकारले निजी सञ्चारमाध्याममाथि सरकारी सूचना तथा विज्ञापन रोक लगाउने निरंकुश निर्णय गरेको आरोप लगाएकी छन्।
उनले सरकारले विद्यार्थी संगठन खारेज गर्ने लगायतका अलोकतान्त्रिक निर्णय फिर्ता लिन माग गरिन्।
उनले महिला तथा किशोरीमाथि हुने साइबर हिंसालाई रोक्न सरकारसँग कडा कदम चाल्न आग्रह गरिन्।

२५ चैत, काठमाडौं । नेपाली कम्युनिस्ट पार्टी (नेकपा) की सांसद जयन्तीदेवी राईले सरकार निरंकुश बन्दै जान लागेको आरोप लगाएकी छन् ।

राष्ट्रिय सभाको बुधबार बसेको बैठकको विशेष समयमा उनले सरकारले निजी सञ्चारमाध्यामहरूमाथि सरकारी सूचना तथा विज्ञापन रोक लगाउने निरंकुश निर्णय गरेको बताएकी हुन् ।

सरकारले छोटो समयमा नै धेरै विवादित निर्णयहरू गर्दै गएको उनको भनाइ छ ।

उनले निजी सञ्चारमाध्यामलाई विज्ञापनमा रोक लगाउने, विद्यार्थी संगठन खारेज गर्ने लगायतका अलोकतान्त्रिक निर्णय गरेकोले फिर्ता लिन माग गरिन् ।

उनले ठूलो जनविश्वास प्राप्त गरेको सरकारको बारेमा बोल्न मन नभए पनि एकपछि अर्को विवादित काम गरे पनि नबोली बस्न नसकेको उल्लेख गरिन् ।

उनले भनिन्, ‘भर्खरै मन्त्रिपरिषद्को सचिवालयले सचिवस्तरीयको निर्णय परिपत्र गरेको छ । त्यो परिपत्र आउँदा नआउँदै अत्यन्तै विवादको अवस्थामा आइपुगेको छ । उक्त परिपत्रमा सरकारका सूचना, विज्ञापनहरू सरकारका सञ्चारमाध्यामले मात्रै गर्न पाउने र निजी सञ्चारमाध्यामले गर्न नपाउने भन्ने किसिमको जुन निर्णय गर्‍यो । त्यो अत्यन्तै गलत छ, त्यो अलोकतान्त्रिक छ ।’

उनले पछिल्लो समय महिला तथा किशोरीमाथि पनि साइबर हमला हुने गरेको बताइन् । महिलामाथि हुने साइबर हिंसालाई रोक्न कडा कदम चाल्न उनले सरकारसँग माग पनि गरिन् ।