भिजिट भिसामा ओमान जानेहरू ठगीमा पर्दै

News Summary

Generated by OK AI. Editorially reviewed.

ओमान पुगेका नेपाली भिजिट भिसामा काम लगाइदिन्छु भन्दै ठगिने क्रम बढिरहेको दूतावासले जनाएको छ।
दूतावासले भिजिट भिसामा आएर काम गर्ने भिसामा परिणत नहुने र ओभर स्टेमा जरिवाना लाग्ने प्रष्ट पारेको छ।
ओमान आउन लागेका नेपालीलाई कामका लागि भिजिट भिसामा नआउन र ठगीमा परे दूतावासमा सम्पर्क गर्न अनुरोध गरिएको छ।

२५ चैत, काठमाडौं । भिजिट भिसामार्फत ओमान पुगेका नेपाली ठगिने क्रम बढिरहेको छ ।

यसरी ओमान पुगेकाहरू कामको प्रलोभनमा ठगिने गरेको र यस्तो संख्या बढिरहेको त्यहाँस्थित नेपाली दूतावासले जनाएको छ ।

दूतावासले सूचना जारी गर्दै भिजिट भिसामा आएर काममा लगाइदिने भन्दै ठगिनेको संख्या बढिरहेको जनाएको हो । ठूलो रकम असुल गरी ओमानमा भिजिट भिसामा पठाएर काममा लगाइदिन्छु भन्दै ठगी गर्नेको संख्या बढिरहेको दूतावासले जनाएको छ ।

अहिले ओमान आएर अलपत्र परेका धेरै नेपालीले दूतावासमा सम्पर्क गरेका छन् । अलपत्र परेका धेरैले ठूलो रकम तिरेको बताएका छन् । तर, रकम बुझाएको प्रमाण केही पनि नहुने र राम्रो तलब सुविधा सहित जागिर लगाइदिन्छु भन्दै ठगी गर्ने गरेको पाइएको दूतावासले जनाएको छ ।

ओमानमा नै बसेर भिजिट भिसामा काम गर्ने भिसामा परिणत नहुने दूतावासले प्रष्ट पारेको छ । भिजिट भिसामा आएको, ओभर स्टे भएर गैरकानुनी रूपमा बसेको अवस्थामा उद्धार कार्यमा निकै समस्या हुने, ओभर स्टे बसेको अवस्थामा दिनको १० ओमानी रियालका दरले जरिबाना लाग्ने समेत दूतावासले प्रष्ट पारेको छ ।

ओमान आउन लागेका नेपालीलाई कामका लागि भनेर भिजिट भिसामा नआउन अनुरोध गरेको छ । कुनै समस्यामा परेको वा ठगीमा परेको खण्डमा दूतावासमा सम्पर्क गर्नसमेत अनुरोध गरिएको छ ।