एमाले प्रदेश कमिटी सदस्य कर्ण मल्लविरुद्ध मुद्दा दर्ता

News Summary

Generated by OK AI. Editorially reviewed.

नेकपा एमालेका कर्णाली प्रदेश कमिटी सदस्य कर्ण मल्लविरुद्ध बलात्कार र गर्भ संरक्षणविरुद्धको दुई वटा मुद्दा दर्ता भएको छ।
प्रहरी वृत्त सातदोबाटाले गरेको अनुसन्धानपछि सरकारी वकिल कार्यालयले ललितपुर जिल्ला अदालतमा मंगलबार मुद्धा दर्ता गरेको हो।
पीडित महिलाले मल्लले २०८० कात्तिकमा चिनजान भएको र १२ चैत २०८० मा बलात्कार गरेको बताएकी छिन्।

७ वैशाख, काठमाडौं । नेकपा एमालेका कर्णाली प्रदेश कमिटी सदस्य कर्ण मल्लविरुद्ध दुई वटा कसुरमा मुद्दा दर्ता भएको छ ।

एक महिलाको जाहेरीका आधारमा मल्लविरुद्ध बलात्कार र गर्भ संरक्षणविरुद्धको कसुरमा मुद्दा दर्ता भएको हो । प्रहरी वृत्त सातदोबाटाले गरेको अनुसन्धानका लागि सरकारी वकिल कार्यालयले ललितपुर जिल्ला अदालतमा मंगलबार मुद्दा दर्ता गरेको हो ।

मुगुको सोरु गाउँपालिका–१० धैनकोट घर भएका ५२ वर्षीय मल्लले आफूमाथि बलात्कार गरेको पीडित महिलाको भनाइ छ ।

ती महिलाका अनुसार उनी गीत गाउने काम गर्दै आएकी थिइन् । सोही क्रममा एक साथीमार्फत २०८० को कात्तिकमा मल्लसँग चिनजान भएको उनको भनाइ छ ।

त्यसपछि १२ चैत २०८० मा एकछि भेटौं भनेर बोलाएको तर सुरुमा आफूले इन्कार गरेको उनको भनाइ छ । मल्लले केही हुँदैन भन्दै सम्झाएपछि भेट गरेको महिलाले बताएकी छिन् ।

खाजा खाएकै होटलको कोठामा मल्लले आफूलाई जबरजस्ती करणी गरेको महिलाको दाबी छ । त्यसयता दुई वर्षसम्म निरन्तर जबरजस्ती करणी गरेको उनले बताएकी छिन् ।

यौन सम्पर्कबाट पेटमा गर्भ बसेको तर उनैले २ असार २०८२ मा गर्भपतन गर्न लगाएको महिलाले बताएकी छिन् ।

त्यसपछि उनले आफूलाई मानसिक यातना दिने गरेको, उजुरी गरे ज्यान मार्नेसम्मको धम्की दिएको महिलाले बताएकी छिन् ।