अर्थ मन्त्रालयको चासोपछि नेप्सेले फिर्ता बोलायो सीडीएससी सीईओ

News Summary

Generated by OK AI. Editorially reviewed.

नेपाल स्टक एक्स्चेन्जले सीडीएस एण्ड क्लियरिङकी प्रमुख कार्यकारी अधिकृत प्रविन पन्दाकलाई फिर्ता बोलाएको छ।
नेप्से सञ्चालक समितिले पन्दाकलाई सीडीएससीको सीईओ पदबाट फिर्ता बोलाउने निर्णय गरेको छ।
अर्थ मन्त्रालयले पन्दाकको सन्दर्भमा चासो देखाएपछि नेप्सेले उनलाई फिर्ता बोलाएको एक अधिकारीले बताए।

११ वैशाख, काठमाडौं । नेपाल स्टक एक्स्चेन्ज (नेप्से)ले सीडीएस एण्ड क्लियरिङकी प्रमुख कार्यकारी अधिकृत (सीइओ) प्रविन पन्दाकलाई फिर्ता बोलाएको छ । नेप्सेको शुक्रबारको सञ्चालक समितिले सीडीएससीको सीइओ पदमा रहेकी नेप्से कर्मचारी पन्दाकलाई फिर्ता बोलाउने निर्णय गरेको हो ।

नेप्सेले सहायक कम्पनी सीडीएससीमा प्रतिनिधि सञ्चालकको रुपमा उनलाई पठाएको थियो । नेप्से सञ्चालक समितिले नै निर्णय गर्दै उनलाई सीईओको जिम्मेबारी तोकेको थियो ।

सीईओमा कार्यरत छँदा सूचीकृत कम्पनीलाई २ आइजिन दिने नीति बनाउने तयारी गरेपछि विवादित भएकी थिइन् । सोही विवादका कारण अर्थ मन्त्रालयले उनको सन्दर्भमा चासो देखाएपछि नेप्से सञ्चालक समितिले फिर्ता बोलाउने निर्णय गरेको नेप्सेका एक अधिकारीले बताए ।

सीडीएससी सञ्चालक समितिमा नेप्सेका तर्फबाट चुडामणी चापागाईं अध्यक्ष र प्रविन पन्दाकले सदस्यका रुपमा प्रतिनिधित्व गर्दै आएकी थिइन् । अर्थ मन्त्रालयबाट अशोक गुरागाईं र शरद निरौला सञ्चालक छन् भने स्वतन्त्र सञ्चालकमा सुमन कुमार नेपाल छन् ।

अब नेप्सेले पन्दाकको ठाउँमा अर्को व्यक्तिलाई सीडीएससीको सञ्चालकका रुपमा पठाउने छ । गत वर्षदेखि पन्दाकले सीडीएससीको प्रबन्ध सञ्चालकको जिम्मेबारी समेत सम्हाल्दै आएकी थिइन । नेप्सेमा उनी दशौं तहकी कर्मचारी हुन् ।