नेपालगन्ज फुड फेस्टिभलमा ओइरिए स्थानीयदेखि भारतसम्मका पर्यटक

१४ वैशाख, नेपालगन्ज । नेपालगन्जमा पहिलो पटक  आयोजना गरिएको  गरिएको स्ट्रिट फुड एन्ड बेभरेज फेस्टिभलमा दर्शकको ओइरो लागेको छ । होटल व्यवसायी संघ बाँके र होटल संघ नेपाल बाँके च्याप्टरले संयुक्त रूपमा यो फेस्टिभलको आयोजना गरेका हुन् ।

फेस्टिभलमा दैनिक करिब १२ हजारले फेस्टिभलको अवलोकन गरेका थिए । नेपालगन्जलगायत बाँके जिल्लाको पर्यटन प्रवर्द्धन गर्ने उद्देश्यले यो फेस्टिभल आयोजना गरिएको आयोजकले जनाएको छ ।

यसमा पर्यटकीय स्थलहरूको प्रचार–प्रसार, स्थानीय परिकारको पहिचान र प्रवर्द्धन, होटल व्यवसायको प्रवर्द्धन गर्ने लक्ष्यका साथ फेस्टिभल सञ्चालन गरिएको थियो ।

स्वदेशी तथा छिमेकी मुलुक भारतका पर्यटकलाई लक्षित गरी आयोजना गरेको फेस्टिभलमा स्ट्रिट फुडदेखि पाँच तारे होटलका स्वादसहितका परिकार एउटै स्थानमा राखिएका थिए ।

फेस्टिभलमा स्थानीय स्तरका परम्परागत तथा आधुनिक खानाका परिकार, पेय पदार्थ उपलब्ध थिए । जहाँ एउटै थलोमा सेल रोटी, चिकेन थाई मम, बिरयानी, बँदिया भाले साँधेको, पिजा, सेकुवा, छोइला, ढिक्री, घोंगी, सातु,  राबडी, शुशी, नबाबी कबाबलगायत सयौं परिकार उपलब्ध थिए ।

यस्तै, स्थानीय कला, संस्कृति र मनोरञ्जनात्मक कार्यक्रम पनि सञ्चालन गरिएका थिए । फेस्टिभलमा होटल तथा अन्य व्यापारिक प्रतिष्ठानका ५५ वटा स्टल राखिएका थिए ।

तीन दिन चलेको फेस्टिभलमा करिब पाँच हजार भारतीय पर्यटकसहित कुल ३५ हजार दर्शकले अवलोकन गरेको होटल व्यवसायी संघ बाँकेका अध्यक्ष भीम कँडेलले बताए ।

नेपालगन्जको प्रचण्ड गर्मीमा साँझ ६ बजे देखि ११ बजेसम्म सञ्चालन भएको यो फेस्टिभलमा पर्यटक आनन्द महसुस गरेको होटेल संघ बाँकेका  उपाध्यक्ष केशव न्यौपानेले बताए ।