प्रहरीको अनुहारमा बालेन र सु‍धन गुरुङ देखिरहेको छु : रास्वपा सांसद खरेल

माजिद अन्सारीको हकमा त उहाँलाई पक्राउ (एरेस्ट) मात्र गरिएको छैन, प्रहरीद्वारा अत्यधिक बल प्रयोग (एक्सेसिभ युज अफ फोर्स) पनि भएको छ। लुछिएको पनि छ, मुक्का हानिरहेको अवस्था पनि छ। उहाँको उपचारको विषयमा कसले हो त्यो क्षतिपूर्ति हेर्ने अथवा नहेर्ने ?

म आफैँ पनि कानुनको विद्यार्थी भइरहेको नाताले माजिद अन्सारीको विषयमा जसरी प्रहरीले कामकारबाही गर्‍यो, त्यो विषयमा मेरो पनि ध्यानाकर्षण भएको कुरा म समिति सभापतिलाई जानकारी गराउन चाहन्छु। र, सभापतिमार्फत सरकारको पनि यस विषयमा के धारणा हो भन्ने कुराको जानकारी लिन चाहन्छु।

कतिपय अवस्थामा त के सम्म देखिँदो रहेछ भन्दाखेरि (हिजोको दिनमा कानुन व्यवसाय गर्दै गर्दा पनि थाहा पाउँथेँ), प्रहरीले भ्यानभित्र लगेर पनि मान्छेहरूलाई कुट्दो रहेछ। भनेपछि, हामी यस्तो खालको व्यवस्थामा बस्न खोजिरहेका छौँ ?

म यो मात्रै कुरा भन्दिनँ, केही समयअगाडि मेरा पार्टी सभापतिलाई एकजना प्रहरीले ‘तपाईंको अन्तिम इच्छा के हो ?’ भनेर सोधेको थियो। मैले त्यसमा त्यो प्रहरीको बोली कहिल्यै देखिनँ, त्यसमा म तत्कालीन सत्ताको, तत्कालीन प्रधानमन्त्रीको र तत्कालीन गृहमन्त्रीको अनुहार देख्थेँ। मेरा पार्टी सभापति रवि लामिछानेलाई राज्यले जुन व्यवहार गर्‍यो, मैले त्यहाँ उहाँहरूको अनुहार देखेको थिएँ।

प्रहरीको बोलीमा, आन्दोलनकारी वा विपक्षी वा समाजमा बसेका प्रत्येक व्यक्तिहरूलाई ‘राजनीति नगर’ भन्दै गर्दा जनताले त्यहाँ अहिलेको गृहमन्त्री र प्रधानमन्त्रीको अनुहार देखेँ भने के हुन्छ ? जसरी मैले हिजो त्यसरी देख्थेँ।

त्यही भएर म सरकारलाई भन्छु– अलिकति… हाम्रो बाटो धेरै लामो छ। हाम्रो बाटो असाध्यै धेरै लामो छ, हामीले बाटो बिराउनु हुँदैन। यो सरकार असफल होस् भनेर विपक्षी वा प्रतिपक्षले पनि चाहेका छैनन्। यो सरकारलाई असफल हुने छुटै छैन। त्यही भएर नआत्तिकनै मानवअधिकारका विषयहरूमा संयमित होला र समाजका सबैभन्दा बढी प्रभावित (भल्नरेबल) व्यक्तिहरूलाई सबैभन्दा बढी सम्मान दिएर अगाडि बढ्नुपर्छ भन्ने कुरा म समिति सभापतिलाई जानकारी गराउँछु।

म अस्ति माजिद अन्सारीलाई भेट्न गएको थिएँ। माननीय मनीषजी र अफसाना बानोजी पनि हुनुहुन्थ्यो, हामीहरू त्यहाँ गएका थियौँ। तत्कालीन अवस्थामा त्यहाँ प्रहरीहरू थिएनन्, म त उहाँ हिरासतबाट छुट्नुभएछ भन्ने हेरेको, आज फेरि सामाजिक सञ्जालमा उहाँले ‘म अझै पनि प्रहरीको हिरासतमा छु’ भनेर भन्नुभएको छ। उहाँ हिरासतमा हुनुहुन्छ कि हुनुहुँदैन भन्ने कुराको पनि अहिले जानकारी छैन। अब मैले त्यसरी हेर्दै गर्दा दुइटा अवस्था पनि देखियो– उहाँको उपचारको विषयमा कसले हो त्यो क्षतिपूर्ति हेर्ने अथवा नहेर्ने ? लगायतको विषयमा मलाई लाग्छ, ‘सरकारको धारणा के छ त ?’ भनेर हामीले बुझ्नुपर्ने अवस्था हुँदै गर्दाखेरि मैले सरकारलाई अलिकति संयमित भएर हिँड्न आग्रह गर्छु।

हामीले धेरै लामो यात्रा तय गर्नुछ, हामीले जनताका अधिकारहरूलाई संरक्षित गर्नुछ, संविधानलाई मान्नुछ। कानुनका विविध प्रक्रियाहरूलाई मान्दै हामी अगाडि बढ्नुपर्ने अवस्था हुँदै गर्दाखेरि, समाजमा फरक मत सबैले राख्छन्। हामीले पनि हिजो फरक मत राखेरै आज यति ठुलो दल बनाएका हौँ। समाजमा फरक मत मात्रै राख्दैमा कसैप्रति पनि उग्र भावले प्रस्तुत नहुन म नेपाल प्रहरीलाई आग्रह गर्दछु।

र, हिजोका दिनका आन्दोलनहरू हुन् या आजका दिनका आन्दोलनहरू हुन्, जसमा नेपाल प्रहरीको त्यस्तो ज्यादतीपूर्ण व्यवहार देखिएको छ, त्यसमा नेपाल प्रहरीले आफैँले औपचारिक रूपमा नै माफी मागोस् ।