रसुवा बाढी : टनेलमा कसरी भइरहेको छ काम ?

१७ भदौ, काठमाडौं । रसुवास्थित भोटेकोशीमा एक्कासि आएको विनाशकारी बाढीबाट तहसनहस भएको क्षेत्रको अहिले पनि खोज तथा उद्धारको काम जारी रहेको छ ।

नेपाली सेना, नेपाल प्रहरी, सशस्त्र प्रहरीका साथै बाह्य देशका उद्धारकहरूको समेत सहयोग र समन्वयमा अहिले काम भइरहेको छ । बाढी गएको एक साता बित्दा पनि टनेलको खोज तथा उद्धारमा भने समस्या आइरहेको छ ।

अहिले निकै जोखिमपूर्ण र कठिन देखिएका यी टनेलहरूमा बाह्य देशका उद्धारकर्ताहरूको समेत सहयोगमा नेपाली सेनाले काम गरिरहेको छ । सैनिक मुख्यालय जंगी अड्डाका अनुसार बुधबार बिहान ११ बजेसम्मको अवस्थामा रसुवागढी हाइड्रोमा करिब १५० मिटरभित्र उद्धार टोली पुगेको छ । ठूला चट्टानहरूका कारण भित्र जान नसकेकाले अहिले पुन: खोज उद्धारको काम भइरहेको सेनाले जनाएको छ ।

त्यस्तै लाङटाङ हाइड्रोमा पनि विदेशीसहित २५ जनाको संयुक्त खोज तथा उद्धार टोलीले टनेलभित्र करिब १५० मिटरसम्म प्रवेश गरेर काम गरिरहेको छ । चिलिमे हाइड्रोमा विदेशीसहितको संयुक्त टोलीले खोज उद्धारको काम गरिरहेको सेनाले बताएको छ ।

माथिल्लो त्रिशूली १ हाँकुमा नेपाली सेनाको टोलीले खोज तथा उद्धारको काम गरिरहेको छ । त्रिशूली–थ्री ए मा नेपाली सेनासहित ९३ जनाको संयुक्त टोलीले ३ वटा स्काभेटर, १ वटा बबक्याटको सहयोगमा माटो पन्छाउने काम भइरहेको सेनाले बताएको छ । त्यस्तै कम्प्रेस मेसिन, ब्रेकर तथा ब्लास्टिङ कार्य गरेपछि टनेलको आउटलेट भेटिएको छ । वर्षाका कारण राति जमेको करिब १.५ मिटर पानीलाई पम्पद्वारा फाल्ने काम भइरहेको छ ।

त्रिशूली–थ्री बीमा नेपाली सेनाका ६१ जना, गैरसैनिक ३ जना र आयोजनाको प्रबन्ध निर्देशकसहितको उद्धार टोलीले काम गरिरहेको छ । यो टोलीले आयोजनाको कार्यालय र निवास पहिचान गरी उक्त इलाकासम्म पुग्न एक्साभेटरबाट बाटो बनाउने काम गरेको जंगी अड्डाले बताएको छ ।