१ अर्बको हुण्डी कारोबारको आरोपमा एक व्यक्ति पक्राउ

सांकेतिक फोटो

News Summary

Generated by OK AI. Editorially reviewed.

सीआईबी र प्रहरीको संयुक्त टोलीले एक अर्ब ३ करोड ८४ लाख ७५ हजार ८४५ रुपैयाँ बराबरको हुण्डी कारोबार आरोपमा ज्योति शाहीलाई धरानबाट पक्राउ गरेको छ।
शाहीले घरेलु तथा साना उद्योग कार्यालय इटहरीमा दर्ता गराएर मनी ट्रान्सफर चलाउँदै आएका थिए।
प्रहरीका अनुसार उनले मनी ट्रान्सफरको नाममा ५२ वटा बैंक तथा वित्तीय संस्थामा खाता खोलेर कारोबार गरेका थिए।

९ असोज, काठमाडौं । एक अर्ब रुपैयाँ भन्दा बढीको हुण्डी कारोबार आरोपमा एक व्यक्ति पक्राउ परेका छन् । पक्राउ पर्नेमा सुनसरीको धरान उपमहानगरपालिका–१३ घर भएका ज्योति शाही छन् ।

उनलाई केन्द्रीय अनुसन्धान ब्यूरो (सीआईबी), कोशी प्रदेश प्रहरी कार्यालय र जिल्ला प्रहरी कार्यालय सुनसरीको संयुक्त टोलीले धरानको खैरेनीबाट बिहीबार पौने ५ बजे पक्राउ गरेको हो ।

उनले १ अर्ब ३ करोड ८४ लाख ७५ हजार ८४५ रुपैयाँ बराबरको हुण्डी कारोबार गरेको भेटिएको सीआईबीका एसएसपी तथा प्रवक्ता अनुपम शमशेर जबराले बताए ।

उनले केही व्यक्तिसँग मिलेर घरेलु तथा साना उद्योग कार्यालय इटहरीमा दर्ता गराएर मनी ट्रान्सफर चलाउँदै आएका थिए ।

प्रहरीका अनुसार मनी ट्रान्सफरको नामबाट कृषि विकास बैंक, सेन्चुरी कमर्सियल बैंक, ग्लोलब आईएमई बैंक लगायत ५२ वटा बैंक तथा वित्तीय संस्थाहरुमा खाता खोलेर सञ्चालन गरेको पाइएको छ ।