डोनाल्ड ट्रम्पले सी जिनपिङलाई ह्वाइट हाउसका नवनिर्मित संरचना अवलोकन गराए

राष्ट्रपति हुनुभन्दा अघि रियल इस्टेट डेभलपर समेत रहेका अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी जिनपिङको अमेरिका भ्रमणका क्रममा ह्वाइट हाउसमा जारी आफ्ना नयाँ निर्माण आयोजनाहरू उत्सुकताका साथ देखाएका छन्।

सन् २०२६ को मे महिनामा बेइजिङस्थित ‘ग्रेट हल अफ द पिपुल’मा सीले ट्रम्पको आतिथ्यता गरेका थिए । जसको विशालतासँग ट्रम्पले ह्वाइट हाउसमा बन्दै गरेको नयाँ बलरुमको तुलना गर्ने गर्छन्।

ओभल अफिसमा ९० मिनेट लामो औपचारिक वार्ता सकिएपछि ट्रम्पले सीलाई ह्वाइट हाउसको ‘साउथ लन’तर्फ लगेका थिए। त्यहाँ नवनिर्मित ग्रेनाइटको हेलिप्याडमा अमेरिकी राष्ट्रपतिको हेलिकप्टर ‘मरीन वान’ पहिले नै राखिएको थियो।

हरियो रङको ‘युनाइटेड स्टेट्स अफ अमेरिका’ लेखिएको हेलिकप्टर नजिक केवल दुई जना कर्मचारीहरूका साथ दुई देशका शीर्ष नेताहरूले कुराकानी गरिरहेको भिडियो एक्स , थ्रेड्स र फेसबुकजस्ता सामाजिक सञ्जालमा द्रुत गतिमा भाइरल बनेको छ।

ट्रम्पले करिब ५० लाख अमेरिकी डलरको लागतमा बनेको हेलिप्याडका विशेषताहरू सीलाई बुझाइरहेका थिए । सीले पनि चासोका साथ प्रश्नहरू सोधिरहेका थिए। त्यसपछि ट्रम्पले सीलाई ‘मरीन वान’ भित्रै लगेर अमेरिकी राष्ट्रपतिले प्रयोग गर्ने विमानलाई नजिकबाट अवलोकन गराए। उनीहरू केही मिनेट विमानभित्रै बसेर पाइलटहरूसँग कुराकानी समेत गरेका थिए।

ग्रेनाइट र नयाँ बलरुममा चासो

ह्वाइट हाउसका विभिन्न निर्माण क्षेत्रहरूको भ्रमण गराउने क्रममा ट्रम्पले प्रयोग गरेको ग्रेनाइट ढुङ्गाले सीको विशेष ध्यान खिचेको थियो। अवलोकनपछि पत्रकारहरूसँग कुरा गर्दै ट्रम्पले भने, ‘हाम्रो बैठक निकै राम्रो रह्यो र उहाँ (सी) ले ग्रेनाइटमा ठूलो रुचि देखाउनुभयो। अन्य धेरै कुराका अलावा उहाँ ढुङ्गाका विषयमा पनि विशेषज्ञ हुनुहुन्छ र उहाँलाई राम्रो ग्रेनाइट मन पर्छ।’

ट्रम्पको यो टिप्पणीमा सी जिनपिङले मुस्कुराउँदै प्रतिक्रिया दिएका थिए।

साँझ आयोजित राजकीय भोज का क्रममा ट्रम्पले सीलाई ह्वाइट हाउसको अर्को मुख्य आयोजना ईस्ट विङ ढालेर निर्माण भइरहेको अर्को मुख्य आयोजना पनि देखाए। ट्रम्पले आफ्नो दोस्रो कार्यकालमा ह्वाइट हाउसको भौतिक रूपान्तरणलाई उच्च प्राथमिकता दिँदै आएका छन्।

गत वर्ष ८,३६० वर्ग मिटर क्षेत्रफलमा फैलिएको यो बलरुम बनाउन ईस्ट विङ भत्काइएको थियो। ट्रम्पले यसलाई अमेरिकी जनताका लागि एउटा ‘उपहार’ भएको र यसले ह्वाइट हाउसको सुरक्षा बढाउनुका साथै ठूला कार्यक्रमहरू आयोजना गर्न सहज बनाउने दाबी गर्दै आएका छन्।

बेइजिङ भ्रमणपछि ट्रम्पले ग्रेट हल अफ द पिपुलमा सीसँगको तस्बिर सेयर गर्दै लेखेका थिए, ‘हेर्नुहोस्, उनीहरूसँग बलरुम छ । यो धेरै ठूलो र सुन्दर छ। मानिसहरूले मलाई योभन्दा पनि राम्रो संरचना बनाउन खोज्दा किन विरोध गर्छन् ?’

चालु महिनाको सुरुमा पनि उनले यो नयाँ बलरुमले चिनियाँ ग्रेट हललाई समेत माथ खुवाउने दाबी गरेका थिए।