अझै ७३ प्रतिशत ग्राहकले काउन्टरमै गएर तिर्छन् बिजुली बिल

२२ असोज, काठमाडौं । अझै पनि ७३ प्रतिशत नागरिकले भौतिक रूपमा काउन्टरमा गएर नै विद्युत् महसुल तिर्ने गरेका छन् ।

नेपाल विद्युत् प्राधिकरणका १ सय २९ वितरण केन्द्र अन्तर्गत शाखामा हाल ६ सय ५५ वटा महसुल संकलन काउन्टर सञ्चालनमा छन् । ती काउन्टर मार्फत प्राधिकरणले भौतिक रूपमै ग्राहकबाट विद्युत् महसुल संकलन गर्दै आएको छ ।

त्यसका लागि वार्षिक ५९ करोड ७९ लाख रुपैयाँ खर्च हुने गरेको पाइएको छ । ऊर्जा, जलस्रोत तथा सिँचाइमन्त्री विराजभक्त श्रेष्ठले डिजिटल माध्यमबाट विद्युत् महसुल तिर्न अपिल गरेका छन् ।

अझै पनि ठूलो संख्यामा नागरिक काउन्टरमै पुग्नुपर्ने अवस्था रहेको बताउँदै उनले अनलाइन मार्फत महसुल तिर्न अनुरोध गरेका हुन् ।

यसका लागि सचेत नागरिकको सहयोगको खाँचो रहेको बताए । डिजिटल भुक्तानीले नागरिकको समय र आवतजावत खर्च बचत हुने, नगद कारोबार घट्दा वित्तीय पारदर्शिता र सुरक्षा बढ्ने मन्त्री श्रेष्ठको भनाइ छ ।

साथै, काउन्टर सञ्चालनमा लाग्ने स्रोत र जनशक्तिलाई अन्य आवश्यक ग्राहक सेवामा सदुपयोग गर्न सकिने धारणा मन्त्री श्रेष्ठको छ ।

मन्त्री श्रेष्ठका अनुसार विद्युत् महसुल तिर्ने करिब ७३ प्रतिशत नागरिक भौतिक रूपमा काउन्टरमै पुग्छन् । भौतिक उपस्थित हुने नागरिकका लागि सञ्चालित महसुल संकलन काउन्टरको खर्च डिजिटल भुक्तानीबाट बचत हुने र उक्त जनशक्तिलाई अन्य काममा लगाउन सकिन्छ ।

‘डिजिटल भुक्तानी गर्दा नागरिकको समय र आवतजावत खर्च बचत हुन्छ, नगद कारोबार घट्दा वित्तीय पारदर्शिता र सुरक्षा बढ्छ साथै काउन्टर सञ्चालनमा लाग्ने स्रोत र जनशक्ति अन्य आवश्यक ग्राहक सेवामा सदुपयोग गर्न सकिन्छ,’ मन्त्री श्रेष्ठले भने ।

त्यसैले आफ्नो परिवार, इष्टमित्र, छरछिमेकी तथा आफूले चिनेकालाई समेत डिजिटल भुक्तानीबारे जानकारी दिन, सिकाउन प्रोत्साहित गर्न मन्त्री श्रेष्ठले अपिल गरे ।