ईसेवा मनी ट्रान्सफर र भिसाबीच रणनीतिक साझेदारी

२८ असोज, काठमाडौं । नेपालको अग्रणी डिजिटल रेमिट्यान्स कम्पनी ईसेवा मनी ट्रान्सफरले विश्वव्यापी डिजिटल भुक्तानी कम्पनी भिसासँग रणनीतिक साझेदारी गरेको छ।

साझेदारीअन्तर्गत भिसा डाइरेक्ट प्लेटफर्मलाई एकीकृत गरिने भएको छ। यसबाट विश्वभरका भिसा डाइरेक्ट सुविधा उपलब्ध गराउने साझेदारमार्फत नेपालमा रेमिट्यान्स पठाउने प्रक्रिया थप सहज हुने अपेक्षा गरिएको छ।

भिसा डाइरेक्ट भिसाको विश्वव्यापी रकम स्थानान्तरणसम्बन्धी प्लेटफर्म हो। यसले योग्य कारोबारका लागि सहभागी वित्तीय संस्था तथा भुक्तानी सेवा प्रदायकमार्फत कार्ड, बैंक खाता तथा डिजिटल वालेटमा रकम पठाउन र प्राप्त गर्न सहयोग गर्छ। यस प्लेटफर्मको एकीकरणले विदेशमा रहेका नेपालीलाई नेपालमा रहेका आफ्ना परिवार तथा आफन्तलाई रकम पठाउन थप सहज विकल्प उपलब्ध गराउने लक्ष्य राखेको छ।

विश्वभर डिजिटल माध्यमबाट हुने अन्तरदेशीय भुक्तानी तथा रेमिट्यान्स सेवाको प्रयोग बढ्दै गएको सन्दर्भमा यो साझेदारीलाई महत्त्वपूर्ण मानिएको छ। अन्तर्राष्ट्रिय भुक्तानी सञ्जाल र नेपालको रेमिट्यान्स पूर्वाधारलाई जोड्दै यस सहकार्यले नेपालमा रेमिट्यान्स प्राप्त गर्ने विभिन्न माध्यममा ग्राहकको पहुँच विस्तार गर्न सहयोग पुर्‍याउने अपेक्षा गरिएको छ।

यस सहकार्यअन्तर्गत ईसेवा मनी ट्रान्सफरले आफ्नो भुक्तानी सञ्जालको उपयोग गर्दै उपलब्ध सेवाअनुसार बैंक खाता तथा ईसेवा वालेटमार्फत रेमिट्यान्स भुक्तानीलाई सहजीकरण गर्नेछ। यसबाट नेपालमा रकम प्राप्त गर्ने ग्राहकले उपलब्ध विकल्पमध्ये आफ्नो आवश्यकताअनुसार रकम प्राप्त गर्न सक्नेछन्। यद्यपि, रकम प्राप्त गर्ने माध्यम सम्बन्धित साझेदार, कारोबारको माध्यम तथा लागु हुने सेवा सर्तअनुसार फरक हुन सक्ने कम्पनीले जनाएको छ।

यस सहकार्यबारे ईसेवा मनी ट्रान्सफरका प्रमुख कार्यकारी अधिकृत अजेश कोइरालाले रेमिट्यान्स सेवालाई सरल, छिटो र सहज बनाउनु कम्पनीको निरन्तरको उद्देश्य रहेको बताए।

“भिसा डाइरेक्टसँगको सहकार्यले हाम्रो अन्तर्राष्ट्रिय भुक्तानी सञ्जाललाई थप सुदृढ बनाउनुका साथै नेपालमा रेमिट्यान्स प्राप्त गर्ने प्रक्रियालाई अझ सहज बनाउन सहयोग गर्नेछ। विश्वव्यापी भुक्तानी प्रविधि र ईसेवा मनी ट्रान्सफरको भुक्तानी सञ्जाललाई एकीकृत गर्दै विदेशमा रहेका नेपाली तथा नेपालमा उहाँका परिवारका लागि थप सहज र पहुँचयोग्य रेमिट्यान्स सेवा प्रदान गर्ने हाम्रो लक्ष्य छ,” उनले भने ।

कम्पनीका अनुसार यो सेवा हाल सहभागी भिसा डाइरेक्ट सुविधा उपलब्ध गराउने साझेदारमार्फत नेपालमा रेमिट्यान्स पठाउन उपलब्ध छ। सेवाको उपलब्धता, रकम प्राप्त गर्ने माध्यम तथा कारोबारका सर्तहरू सम्बन्धित साझेदार र लागू हुने व्यवस्थाअनुसार निर्धारण हुनेछन्।