काठमाडौंबाट पूर्वी पहाड जान यी हुन् बीपी राजमार्गको विकल्प

२० असोज, काठमाडौं । असोज दोस्रो साता आएको अविरल वर्षा र त्यसले निम्त्याएको बाढी–पहिरोले काठमाडौंका नाका ठप्प बने । त्यसमध्ये पूर्वी नेपाललाई काठमाडौंसँग जोड्ने सबैभन्दा व्यस्तमध्येको एक बीपी राजमार्ग र यसले जोड्ने जिल्लामा अझै पनि यातायात सहज सुचारु हुन सकेको छैन ।

भौतिक, पूर्वाधार तथा यातायातमन्त्री देवेन्द्र दाहालका अनुसार बीपी राजमार्गमा अझै ६ सय सवारीसाधन फसेको अवस्था छ । सहचालक र ड्राइभर समेत फसेका छन् । यद्दपि, जटिल खालका उद्धार भने भइसकेको छ ।

उनका अनुसार बीपी राजमार्गको रोशी खोलादेखि पूर्व–दक्षिण १२ किलोमिटरसम्म बाटो बगाएको छ । सोहीकारण यहाँ तत्काल यस राजमार्गमा यातायात सञ्चालन हुने सम्भावना छैन ।

उनका अनुसार कतिपय स्थानमा अहिले डाइभर्सन नै निकाल्न समस्या छ । सोहीकारण दशैं अगाडि बीपी राजमार्गमा सवारी सुचारु हुने सम्भावना छैन । यस्तो अवस्थामा अब यात्रुले विकल्प खोजेर यात्रा गर्नुपर्ने छ ।

बीपी राजमार्गले काठमाडौं हुँदै पूर्वी तराई जाने सबै यात्रुलाई सेवा दिइरहेको छ । काभ्रेपलाञ्चोक बनेपाबाट सुरु हुने राजमार्गको तराईतर्फको बिन्दु महोत्तरीको बर्दीबासमा पर्छ ।

यो पनि पढ्नुहोस

शहर पस्न थाले बाढी–पहिरो पीडित

यो राजमार्गले काभ्रेपलाञ्चोक, सिन्धुली र महोत्तरीलाई छुन्छ, तर यो अवरुद्ध हुँदा यी तीन जिल्लाबाहेक रामेछाप, ओखलढुंगा, भोजपुर, खोटाङ र सोलुखुम्बु जान समेत असर परेको छ । ती जिल्ला जानसमेत अब यात्रुले विकल्प खोज्नुपर्ने भएको छ ।

नेपाली सेनाका अनुसार सिन्धुली र रामेछाप जोड्ने बीपी राजमार्ग र पुष्पलाल राजमार्गको सुनकोसी नदीमाथि नेपाली सेनाको टोलीले बेलिब्रिज जडान कार्य सुरु गरेको छ । यो पुल सञ्चालनमा आएपछि भने बर्दीबासबाट बीपी राजमार्ग हुँदै सहज रामेछाप पुग्न सकिन्छ ।

बीपी राजमार्गको धुलिखेल–भकुन्डेबेसी–मंगलटार–नेपालथोक–खुर्कोट–बर्दीबास खण्डमध्ये भुकुन्डेबेँसी–नेपालथोक खण्डमा यातायात अवरुद्ध छ । बीपी राजमार्गमा फसेका गाडी उद्धारका लागि मंगलटारबाट तेमाल–कानपुर हुँदै भकुन्डेबेँसी गाडी चल्न थालेका छन् । तर, यो विकल्प भने होइन ।

भकुन्डेबेँसी हुँदै जाने एकमात्र विकल्प तेमाल–सिधुरेटार हुँदै रामेछाप तरेर सुनाकोठी–खाँडादेवी हुँदै मन्थली पुग्न सकिन्छ । रामेछापका प्रमुख जिल्ला अधिकारी राजुप्रसाद पौडेलले यो सडक पनि सोमबारदेखि मात्र सुचारु हुने सम्भावना रहेको बताए ।

यो पनि पढ्नुहोस

थातथलो छोड्न मन छैन, बस्ने अवस्था रहेन

उनका अनुसार काभ्रे प्रशासनसँग कुरा गरी एकतर्फी प्रतिघण्टा १५/२० मात्र गाडी पठाउने गरी सडक चलाउने तयारी गरिएको छ । सुनकोसी तरेपछि मध्यपहाडी विकल्प हुन सक्ने थियो । तर, विभिन्न स्थानमा गएको पहिरोले यो सडक पनि भरपर्दो छैन । साथै, रामेछाप जोड्ने अहिलेको सबैभन्दा सहज विकल्प काठमाडौं–धुलीखेल–दोलालघाट–चरिकोट–किर्ने हुँदै मन्थली हो ।

यसका साथै बर्दीबास–सिन्धुली–खुर्कोट हुँदै सित्खापुल तरेर रामेछाप पुग्न सकिन्छ । त्यहाँबाट खाडादेवी हुँदै मन्थली विकल्प पनि छ । यो सडकमा पनि विभिन्न स्थानमा समस्या रहेको प्रशासनले जनाएको छ ।

काठमाडौंबाट सिन्धुली, खोटाङ, सोलुखुम्बु, भोजपुर जानेका लागि भकुन्डेबेँसी हुँदै तेमाल–सिधुरेटारबाट रामेछापस्थित मध्यपहाडी राजमार्ग निस्किएर सोही राजमार्ग हुँदै सित्खापुल तरेर सिन्धुली आउन सकिन्छ । सोलुखुम्बु जानेका लागि चरिकोट–जिरी हुँदै जाने अर्को विकल्प समेत छ ।

बीपी राजमार्ग हुँदै पूर्वी पहाडका जिल्लामा जान हेटौंडाबाट मदन भण्डारी राजमार्ग हुँदै सिन्धुलीमाडी–खुर्कोट भएर उदयपुरको घुर्मी हुँदै सुनकोसी तर्न सकिने विकल्प पनि छ ।

यो पनि पढ्नुहोस

‘बस्ने रहर लाग्दालाग्दै घर गयो’

यो पनि पढ्नुहोस

अत्यासलाग्दो बेथानचोक

यो पनि पढ्नुहोस

‘पर्यटकीय हब’ मुलकोट माथि बाढीको बज्रपात

यो पनि पढ्नुहोस

बाढीले खोसेको खुर्कोटको खुसी