४ चैत, काठमाडौं । एपीएफका क्षितिज खनाल र नेपाल प्रहरीकी निता लम्सालले तेस्रो यलम्बर राष्ट्रव्यापी खुला ब्याडमिन्टन प्रतियोगिताको सिंगल्सको उपाधि जितेका छन् । क्षितिज पुरुष र निता महिलामा च्याम्पियन बने ।
नखिपोट युथ क्लबको आयोजना तथा नखिपोट ब्याडमिन्टन सर्कलको सह–आयोजनामा भएको प्रतियोगिताको पुरुष फाइनलमा क्षितिजले नेपाल आर्मीका विवेक चौधरीलाई २१–८ र २१–१५ को सोझो सेटमा पराजित गरे । धादिङका सुजन थापा र एपीएफका भोजबहादुर गुरुङ तेस्रो भए ।
नखिपोटस्थित आयोजक क्लबको कभर्डहलमा भएको महिला फाइनलमा निताले आर्मीकी अनुमाया राईलाई सीधा सेटमा २१–१२ र २१–१३ ले हराइन् । आर्मीकी शेस्ना सिर्पाली र स्पोर्ट्स हबकी सीताकुमारी राई तेस्रो बने ।
पुरुष/महिला दुवैमा शीर्ष तीन स्थान हात पार्नेले क्रमशः ३० हजार, १५ हजार र ७५००/७५०० नगद पुरस्कार प्राप्त गरे ।
यू–१७ पुरुष सिंगल्समा प्रहरीका कविर केसीले स्वर्ण जिते । उनले फाइनलमा आर्मीका सुविन श्रेष्ठलाई २१–१०, १६–२१ र २१–११ को सेटमा पाखा लगाए । फिट्नेस पार्कका अमन डंगोल र लभ बीएका इमा तामाङ तेस्रो स्थानमा रहे । पहिलो हुनेले १५ हजार, दोस्रोले १० हजार र तेस्रोले ५/५ हजार नगद पुरस्कार हात पारे ।
मिक्स डबल्समा एपीएफका क्षितिजले शोभा गौचनसँग मिलेर अर्को स्वर्ण जिते । उक्त जोडीले फाइनलमा प्रहरीका जीवन आचार्य र निता लम्सालको जोडीलाई २१–१२ र २१–५ को सोझो सेटमा पाखा लगाए । आर्मीका पविन लिङथेप र अनुमाया राई तथा आर्मीका विधान अधिकारी र अमिता गिरीको जोडीले तेस्रो स्थानमा चित्त बुझाए । विजेताले ३० हजार, उपविजेताले १५ हजार र तेस्रोले ७५०० नगद पुरस्कार पाए ।
भेट्रान ४५ वर्षमाथि पुरुष डबल्समा पीएफसीका सञ्जय कपाली र अनिल थाम्सुहाङ को जोडीले बाजी मारे । सञ्जय र अनिलको जोडीले फाइनलमा तनहुँका देव गुरुङ र कास्कीका शम्भुकुमार श्रेष्ठको जोडीमाथि २२–२० र २१–१७ को जित दर्ता गरे ।
बालकुमारी रिमिक्स क्लबका शान्त डंगोल र कृष्ण श्रेष्ठ तथा चन्द्रागिरीका हरि खत्री र राजकुमार पोखरेलको जोडी तेस्रो स्थानमा रहे । शीर्ष तीन स्थानमा रहनेले क्रमशः ३५ हजार, २० हजार र १०–१० नगद पुरस्कार प्राप्त गरे ।
पुरुष डबल्समा आर्मीका पविन लिङथेप र विधान अधिकारीको जोडीले फाइनलमा सूर्यदर्शनका दीपक राणा र जनिश थकालीको जोडीलाई २१–१६, २२–२० र २१–१४ ले पन्छ्याउदै पहिलो भए ।
धादिङका राम मल्ल ठकुरी र सुजन थापा तथा बालकुमारी रिमिक्स क्लबका सुमित महर्जन र सुमन शाक्यको जोडी तेस्रो भए । पहिलो हुनेले ५० हजार, दोस्रोले २५ हजार र तेस्रोले १०/१० हजार नगद पुरस्कार पाए ।
चारदिने प्रतियोगिता १ सय ३१ खेलाडीको सहभागिता रहेको थियो । विभिन्न छ स्पर्धामा प्रतिस्पर्धा भएको थियो ।
प्रतिक्रिया 4