सैनिक कल्याणकारी कोषको २ करोड घोटाला प्रकरण : पूर्वजमदार कारागार चलान

२८ वैशाख, काठमाडौं । सैनिक कल्याणकारी कोषको दुई करोड रुपैयाँ घोटाला प्रकरणमा पक्राउ परेका पूर्वजमदार कारागार चलान भएका छन् ।

पूर्वजमदार आत्मराम थापालाई काठमाडौं जिल्ला अदालतका न्यायाधीश दिवाकर भट्टको इजलासले पुर्पक्षका लागि कारागार चलानको आदेश दिएको हो । आइतबार न्यायाधीश भट्टको इजलासले कारागार चलानको आदेश दिएकाले कारागार पठाउन लागिएको जिल्ला प्रहरी परिसर काठमाडौंले बताएको छ ।

बहालवाला सहायक रथी रोशन खड्का र बहालवाला सेनानी बोधराज कार्कीसमेतको मिलेमतोमा सैनिक कल्याणकारी निर्देशनालय अन्तर्गतको आवास तथा बीमा शाखाबाट २ करोड २१ लाख ८५ हजार ५१५ रुपैयाँ घोटाला भएको थियो ।

यो प्रकरणमा नेपाली सेनाका अवकाशप्राप्त जमदार ४५ वर्षीय थापालाई परिसर काठमाडौंले पक्राउ गरेर अनुसन्धान गरेको थियो । यही प्रकरणमा संलग्न रहेको आरोप लागेका अवकाशप्राप्त प्रमुख सेनानी लक्ष्मण अधिकारी भने अहिलेसम्म फरार छन् । अधिकारीलाई भने फरार प्रतिवादी बनाएर मुद्दा दायर भएको थियो ।

परिसरले गरेको अनुसन्धान प्रतिवेदनका आधारमा जिल्ला सरकारी वकिल कार्यालयले गत शुक्रबार काठमाडौं जिल्ला अदालतमा आपराधिक विश्वासघातको कसुरमा मुद्दा दायर गरेको थियो । मुलुकी फौजदारी अपराध संहिता २०७४ को दफा २५२ को कसुरमा थापा र अधिकारीविरुद्ध मुद्दा दायर भएको थियो ।

जसमा ठगी बराबरको रकम २ करोड २१ लाख ८५ हजार ५१५ रुपैयाँ बिगो र क्षतिपूर्ति समेत मागदाबी गरिएको थियो । त्यसैगरी आपराधिक विश्वासघात गर्नेलाई ५ वर्षसम्म कैद र ५० हजार रुपैयाँसम्म जरिवाना हुने व्यवस्था रहेकाले सोही अनुसार मागदाबी गरिएको छ । सोही मुद्दामा उनी पुर्पक्षका लागि कारागार चलान भएका हुन् ।

यो पनि पढ्नुहोस

कल्याणकारी कोषको २ करोड घोटाला : पूर्वजमदार प्रहरी हिरासतमा, सहायक रथी छानबिनमा

रकम घोटाला भएको जानकारी पाएपछि सैनिक प्रहरी गण जंगीअड्डाले ३१ चैत २०८१ मा जिल्ला प्रहरी परिसर भद्रकाली, काठमाडौंलाई पत्राचार गर्दै यो प्रकरणको अनुसन्धान गर्न भनेको थियो । पक्राउ परेका आरोपित थापाले सहायक रथी खड्का र सेनानी कार्कीको नाम लिएका थिए । उनीहरूको हकमा भने आन्तरिक छानबिन भइरहेको सेनाले बताएको छ ।

करिब ७ वर्ष पहिले २०७४ सालदेखि नै सैनिक कल्याणकारी निर्देशनालबाट रकम घोटाला भए पनि यसको ७ वर्षपछि मात्रै सेनाले थाहा पाएको थियो । आवास तथा बीमा वापतको रकमबाट १३ कात्तिक २०७४ देखि २६ भदौ २०७५ सम्मको अवधिमा रकम घोटाला भएको थियो । यो अवधिको बीचमा १४४ वटा चेकबाट १ करोड ७४ लाख २१ हजार ३२९ रुपैयाँ अपचलन भएको थियो ।

त्यसैगरी ९ फागुन २०७३ देखि १७ असोज २०७५ सम्म ४० वटा चेकमार्फत ४७ लाख ६४ हजार १८५ रुपैयाँ रकम अपचलन गरेको बताइएको छ ।

यो अवधिमा उक्त शाखामा कार्यरत जमदार कर्मचारी थापा कार्यरत थिए । उनैले विभिन्न व्यक्तिका काल्पनिक नाम उल्लेख गरी रकम अपचलन गरेको अनुसन्धानबाट खुलेको छ ।

यसरी रकम अपचलनमा संलग्न भएका पूर्वजमदार थापा २२ पुस २०५९ मा अमल्दार कर्मचारीको रूपमा सेनामा भर्ना भएका थिए । उनी २०७३ देखि २०७५ को बीचमा सैनिक कल्याणकारी निर्देशनालय अन्तर्गतको आवास तथा बीमा शाखा भद्रकालीमा कार्यरत थिए ।

यो बीचमा उक्त निर्देशनालयमा तत्कालीन सेनानी लक्ष्मण अधिकारी, तत्कालीन सेनानी बोधराज कार्की र तत्कालीन प्रमुख सेनानी रोशन खड्का कार्यरत थिए ।

थापाले भने उनीहरू भने बमोजिम तथा दिएको सूची अनुसार नै चेक तयार गर्न लगाउने गरेको दाबी गर्दै बयान दिएका थिए । आफू सबैभन्दा जुनियर कर्मचारी भएकाले हाकिमले भने बमोजिम नै ती चेकहरू नेपाल बैंक लिमिटेडको त्रिपुरेश्वर शाखामा पेस गरेर भुक्तानी लिई रकम फेरि हाकिमलाई नै दिएको थापाको भनाइ छ ।

यो काम गरेपछि खड्का, कार्की र अधिकारीले आफूलाई बिदामा सहुलियत, पेट्रोल कुपन दिएको क्यान्टिनमा खाजा खुवाएको थापाले बताएका छन् ।