युवतीलाई भारत पुर्‍याएर यौन धन्दामा लगाएको आरोपमा एक महिला पक्राउ

Quick Summary

AI-generated by OK AI. Editorially reviewed.

एक महिला पक्राउ परेकी छिन् जसले युवतीलाई नयाँ कपडा किनिदिने भन्दै भारतको रक्सौलमा लगेर यौन व्यवसायमा लगाएको आरोप लागेको छ।
पक्राउ परेकी महिला अलिया खातुनविरुद्ध मानव बेचबिखन र ओसारपसारको कसुरमा अनुसन्धान भइरहेको छ र उनलाई पाँच दिनको म्याद थपिएको छ।
यसअघि पनि खातुनले अन्य बालिकालाई भारत लगेर यौन व्यवसायमा लगाएको भन्ने सूचनाका आधारमा अनुसन्धान जारी रहेको प्रहरीले जनाएको छ।

२९ वैशाख, काठमाडौं । पीडित एक युवतीलाई नयाँ कपडा किनिदिने भन्दै भारतको रक्सौलमा लगेर यौन पेसामा लगाएको आरोपमा एक महिला पक्राउ परेकी छिन् ।

पक्राउ पर्नेमा वीरगञ्ज महानगरपालिका-१६ नगवाकी २० वर्षीया अलिया खातुन छिन् । उनलाई जिल्ला प्रहरी कार्यालय पर्साको टोलीले पक्राउ गरेको हो ।

पक्राउ परेकी खातुनविरुद्ध पर्सा जिल्ला अदातबाट मानव बेचबिखन तथा ओसार पसारको कसुरमा ५ दिनको म्याद लिएर अनुसन्धान अघि बढाइएको पर्सा प्रहरीका सूचना अधिकारी तथा डीएसपी किशोर लम्सालले बताए ।

यही वैशाखको २१ गते एक युवतीलाई उनले नयाँ कपडा किनिदिन्छु भन्दै भारतको रक्सौल पुर्‍याएकी थिइन् । त्यहाँ लगेर ती युवतीलाई उनले यौन पेसामा लगाएको प्रहरीले बताएको छ । ती युवतीलाई उद्धार गरेर नेपाल फिर्ता ल्याइएको डीएसपी लम्सालले बताए ।

यसअघि पनि खातुन अन्य बालिकाहरुलाई यसैगरी भारत लगेर यौन पेसामा लगाउने गरेको भन्ने सूचना आएकाले त्यसतर्फ पनि अनुसन्धान अघि बढाइएको प्रहरीले बताएको छ ।