भारत वा अमेरिकाले नेपालमा राजतन्त्र ल्याउने प्रयास गरेको भए लडाइँ हुन्छ : बिजुक्छे

News Summary

Generated by OK AI. Editorially reviewed.

नेपाल मजदुर किसान पार्टीका अध्यक्ष नारायणमान बिजुक्छेले अहिले नेपालमा राजा ल्याउनु नहुने बताए।
उनले संवैधानिक राजतन्त्र नमान्दा नै राजा ज्ञानेन्द्र शाह राजाबाट हटाइएको बताए।
बिजुक्छेले भारत वा अमेरिकाले नेपालमा राजतन्त्र ल्याउने प्रयास गरे देशमा लडाईं हुने बताए।

६ जेठ, काठमाडौं । नेपाल मजदुर किसान पार्टीका अध्यक्ष नारायणमान बिजुक्छेले अहिले नेपालमा राजा ल्याउनु नहुने भनाइ राखेका छन् ।

मंगलबार भक्तपुरमा आयोजित एक कार्यक्रमपछि कुरा गर्दै उनले नेपालमा अहिले राजतन्त्र ल्याउन नहुने बताएका हुन् । संवैधानिक राजतन्त्र नमानेकाले नै तत्कालीन राजा ज्ञानेन्द्र शाह राजाबाट हट्नुपरेको उनले बताए ।

भारत वा अमेरिकाले नेपालमा राजतन्त्र ल्याउने प्रयास गरेको खण्डमा देशमा लडाईं हुने उनले बताए ।

‘अहिलेको राजाले त सबैलाई जेलमा हालिदियो । विरोध भएर गयो । फेरि त्यो आयो भने फेरि जान्छ । बाँकी त रहँदैन नि । यदी त्यसलाई इन्डियाले वा अमेरिकाले ल्याएको हो भने लडाईं हुन्छ देशमा,’ उनले भने, ‘बन्दुक बाहेक अरु उपाय त जनताले मान्दैनन् । अफगानिस्तानमा पनि राजालाई पछि बोलाएको हो । गद्दीमा अब बस्दिन भन्यो । बस्नै सक्दैनन् ।’

उनले अहिलेका दलहरू झगडा गरेर भएका एक दुई वटा नदीनाला पनि नदेलान् भन्ने चिन्ता आफूलाई रहेको उनले बताए ।

‘अहिले हामीलाई डर छ कि पार्टीहरू झगडा गरेर एक दुई वटा नदीनाला बाँकी छ । त्यो नदेलान् । राजा ल्यायो भने राजाले त अहिले बोलाएर सही गराउँछ । सकिन्छ । त्यसकारण अहिले राजालाई ल्याउनु हुँदैन,’ बिजुक्छेको भनाइ छ ।

अध्यक्ष बिजुक्छेले अहिलेका राजनीतिक दलहरूले कार्यकर्ताहरूलाई पैसा, जग्गा बाँड्ने काम मात्रै गरेको आरोप पनि लगाए ।