रुपन्देही प्रशासनले बन्द गरायो बुटवलका ६ क्लिनिक

News Summary

Generated by OK AI. Editorially reviewed.

जिल्ला प्रशासन रुपन्देहीले मापदण्ड विपरीत सञ्चालन भएका ६ वटा क्लिनिक बन्द गरेको छ।
अनुगमनले ११ क्लिनिकको जाँच गर्दा ६ वटा दर्ता नभएको भेटिएपछि बन्द गरिएको हो।
सञ्चालकलाई दर्ताको प्रमाणपत्र लिएपछि मात्रै क्लिनिक सञ्चालन गर्न अनुमति दिइनेछ।

२२ जेठ, बुटवल । मापदण्डविपरीत सञ्चालित बुटवलका ६ वटा क्लिनिकलाई जिल्ला प्रशासन रुपन्देहीको अनुगमन टोलीले बन्द गराएको छ ।

नियमविपरीत चिकित्सक राखेर चेकजाँच तथा उपचार समेत गराउने फार्मेसी र दर्ताविना चलेका क्लिनिकलाई लुम्बिनी प्रदेश स्वास्थ्य निर्देशनको आग्रहपछि प्रशासनले अनुगमन गरेको हो ।

बिहीबार अनुगमन टोलीले विभिन्न ११ वटा क्लिनिकमा अनुगमन गर्दा ६ वटा क्लिनिक दर्ताविना नै सञ्चालन गरेको भेटिएपछि बन्द गराइएको रुपन्देहीका सहायक प्रमुख जिल्ला अधिकारी चिरञ्जीवी रानाले जानकारी दिए ।

टोलीले अस्पताल लाइनमा रहेको रुचिका क्लिनिक, मंगलम स्वास्थ्य क्लिनिक, पुनम मेडिकल एन्ड क्लिनिक, चन्दन स्वास्थ्य क्लिनिक एन्ड फार्मेसीको कलेक्स प्रयोगशाला बन्द गराइएको सहायक प्रजिअ रानाले बताए । त्यस्तै बरदान क्लिनिक प्रालि र शिला मेडिकल हलको क्लिनिकलाई पनि बन्द गराएको छ ।

अनुगमन टोलीले अस्पताल लाइनकै बुटवल डेन्डल प्रालिलाई पनि बन्द गरेको छ । अनुगमनका क्रममा अधिकांश मेडिकलहरूले क्लिनिक सञ्चालन गरेका तर दर्ता नै नगरेको भेटिएको थियो । बन्द गरिएका सबै क्लिनिक सञ्चालकलाई दर्ताको प्रमाणपत्र लिएपछि मात्र सञ्चालनका लागि अनुमति दिइने छ ।