फिल्म ‘कोसेढुंगा’को तीज गीत ‘नत्र भने जिन्दगी व्यर्थ छ’ सार्वजनिक

News Summary

Generated by OK AI. Editorially reviewed.

फिल्म 'कोशेढुंगा'को गीत 'नत्र भने जिन्दगी व्यर्थ छ' युट्युबमा सार्वजनिक भएको छ।
गीतमा खेम सेन्चुरीको संगीत, नेत्र अर्यालका शब्द र समीक्षा अधिकारी तथा दिपिका बयम्बुको स्वर छ।
गीतले विवाहित र अविवाहित महिलाबीचको अन्तर र तीज पर्वको सांस्कृतिक पक्ष चित्रण गरेको छ।

काठमाडौं । फिल्म ‘कोसेढुंगा’को गीत ‘नत्र भने जिन्दगी व्यर्थ छ’ युट्युबमा सार्वजनिक भएको छ । निर्माताले सोमबार आयोजित पत्रकार सम्मेलनमा गीतको भिडियो स्क्रिनिङ समेत गरे ।

सार्वजनिक गीतमा खेम सेन्चुरीको संगीत र नेत्र अर्यालका शब्द छन् । सेन्चुरीसँगै समीक्षा अधिकारी र दीपिका बयम्बुले स्वर दिएका छन् ।

गीत तीजको सेटअपमा छ । गीतले विवाहित र अविवाहित बीचको अन्तरलाई चित्रण गर्छ । विवाहित हुँदाको राम्रो पक्ष र अविवाहितले जीवनसाथी हुँदाको परिकल्पना र हुने उत्सुकता गीतमा समेटिएको छ ।

विवाहित र अविवाहित महिलाले तीजका गीतमा कसरी आफ्नो बह पोखेर रमाइलो गर्छन्, भन्ने पक्षलाई चित्रण गरिएको छ ।

गीतमा कलाकार सुरक्षा पन्त र नीति शाहले अविवाहितको पक्षबाट आफ्नो उत्सुकता राखेका छन् । विवाहित हुँदाको कुरा प्रेम ऋचा शर्माले व्यक्त गरेकी छन् ।

आउँदै गरेको तीज पर्वको अवसरमा यो गीत दर्शकलाई रुचिकर हुनसक्छ । गीतमा टिकटक प्रतिस्पर्धा समेत घोषणा गरेको छ । सहभागीले अगस्ट २० सम्म प्रतिस्पर्धामा भाग लिन पाउनेछन् ।

सरोज पौडेलले निर्देशन गरेको यो फिल्म भदौ १२ गतेदेखि प्रदर्शन तयारीमा छ । फिल्मलाई नरदेवी फिल्मसको प्रस्तुति र सारंगी फिल्मस्को सहकार्यमा निर्माण गरिएको हो ।

कार्यकारी निर्मातामा दिनेश खड्का छन् । निर्मातामा प्रेविल कँडेल र किशोर अनुराग छन् ।