रचना दाहालको नयाँ म्युजिक भिडियो ‘हे भगवान’ शनिबार आउँदै

News Summary

Generated by OK AI. Editorially reviewed.

गायिका रचना दाहालले शनिबार एक्सओ क्लबमा नयाँ म्युजिक भिडियो 'हे भगवान' सार्वजनिक गर्ने भएकी छन्।
'जन्मदाग' एल्बमको 'तिमी भए' म्युजिक भिडियो सार्वजनिक गरेको ३ महिनापछि उनले नयाँ गीत ल्याउन लागेकी हुन्।
भिडियो प्रिमियरपछि 'जन्मदाग' एल्बमको पूर्ण लाइभ प्रस्तुति हुनेछ जसमा दाहालको ब्याण्डका सदस्यहरू सहभागी हुनेछन्।

काठमाडौं । चर्चित गायिका तथा गीतकार रचना दाहालले नयाँ म्युजिक भिडियो ल्याउने भएकी छन् । शनिबार एक्सओ क्लबमा हुने सांगीतिक प्रस्तुतिको क्रममा उनले नयाँ म्युजिक भिडियो ‘हे भगवान’ सार्वजनिक गर्ने भएकी हुन् ।

‘जन्मदाग’ एल्बमको ‘तिमी भए’ बोलको म्युजिक भिडियो सार्वजनिक गरेको ३ महिनापछि उनले नयाँ गीत ल्याउन लागेकी हुन् ।

भिडियो प्रिमियरपछि ‘जन्मदाग’ एल्बमको पूर्ण लाइभ प्रस्तुति हुनेछ । प्रस्तुतिमा दाहालको ब्याण्डका सदस्यहरू रोशन शर्मा (गिटारिस्ट), रोशन पुत्वर (बाँसुरी), किरण शाही (ड्रमर) र सनिष महर्जन (बास गिटार) सहभागी हुनेछन् ।

प्राविधिक टिममा साउन्ड इन्जिनियर युकेश परियार र इमानविक्रम शाह, लाइटिङ इन्जिनियर सक्षम चित्रकार र स्क्रिन टेक्निसियन किरण थापा छन् ।

‘हे भगवान’ र ‘तिमी भए’सँगै, एल्बममा ‘असम्भव’, ‘अलगाव’, ‘दागबत्ती’ र ‘आज्ञा’जस्ता गीतहरू पनि समावेश छन् ।

दाहाल आफ्नो उत्कृष्ट गीत-लेखन क्षमताका लागि प्रशंसित छिन् । उनका गीतले नेपाली समाजमा चर्चा नपाएका विषयहरू, जस्तै विषाक्त सम्बन्ध, मानसिक स्वास्थ्य र भावनात्मक असरलाई समेट्छन् ।